Dünya haqqında nə qədər çox bilsək də, hələ də öyrənməli olduğumuz çox şey var. Planetimiz saysız-hesabsız sirlər saxlayır, amma bəlkə də heç biri Bermud Üçbucağında baş verənlər qədər maraqlı deyil.

Əsrlər boyu bu ərazidə gəmilərin batması, təyyarələrin yoxa çıxması kimi qəribə hadisələr yaşanıb. Lakin indiyədək heç kim orada baş verənləri tam şəkildə izah edə bilməyib.

Sfera.az Bermud Üçbucağı ilə bağlı məşhur nəzəriyyələr haqqında məlumat təqdim edir.

İstər təbii hadisələrlə, istərsə də yadplanetlilərin fəaliyyəti ilə izah edilsin, dünyanın müxtəlif yerlərindən mütəxəssislər hələ də bu “ölüm zonasında” nələrin baş verdiyini araşdırmaqda davam edirlər. Buranın sularında gəmilər qeyb olur, təyyarələr göydən düşür, sirr isə hələ də açılmayıb.

1800-cü ildən bu yana Bermud Üçbucağı 20-dən çox gəmini “tələyə salıb” və onların bir çoxu heç vaxt tapılmayıb. Bu gün də həmin ərazi ən təcrübəli dənizçilər və pilotlar üçün belə qorxu mənbəyidir.

Şimali Atlantik okeanında — Florida, Bermud və Puerto Rikonun yaratdığı üçbucaq arasında yerləşən bu əfsanəvi yer qeyri-müəyyənlik, təhlükə və ölüm anlayışları ilə sinonimə çevrilib.

Bu təhlükəli məkanda nə baş verir?

Bermud Üçbucağı güclü Atlantik tropik fırtınalarına meyllidir və bu fırtınalar ən möhkəm gəmiləri belə məhv edə bilər. Üstəlik, Qolfstrim cərəyanı hava şəraitində qəfil və kəskin dəyişikliklər yaradır ki, bu da dənizçiləri çaşdıraraq faciələrə səbəb ola bilər.

Bundan başqa, Karib dənizində çoxlu sayda iri adalar və dayaz sular mövcuddur ki, bu da naviqasiyanı çətinləşdirir. Həmçinin, bəzi tədqiqatlara görə, Bermud Üçbucağında kompas bəzən “maqnit şimalı”na deyil, “əsl şimala” yönəlir.

ABŞ Hərbi Dəniz Qüvvələri və Sahil Mühafizəsi bu ərazidə yadplanetlilərin və ya fövqəltəbii qüvvələrin fəaliyyətinə dair heç bir sübutun olmadığını bildirərək, baş verənləri təbii qüvvələrlə izah edir.

Bermud Üçbucağı – Zaman səyahəti nəzəriyyəsi

Bəzi insanlar hesab edir ki, yadplanetlilər bu ərazidən insanlara qarşı eksperimentlər aparmaq üçün istifadə edirlər. Onlara görə, burada “məkan-zaman dəlikləri” mövcuddur və batan gəmilərin, yoxa çıxan təyyarələrin bir hissəsi bu dəliklər vasitəsilə başqa zamanlara və məkanlara ötürülə bilər.

Pilot Bryus Gernon da Bermud Üçbucağında zamanla bağlı qəribə hadisə yaşadığını iddia edib.

O deyib: “Bu hadisəyə qədər zaman səyahətinə və teleportasiyaya inanmırdım. Amma uçuş zamanı gəmimi sıx bir duman bürüdü və qəfil 100 mil irəli tullandım".

Onun hekayəsi dünya miqyasında böyük maraq doğurub və “Bermud Üçbucağının O tayında” adlı kitabında bu təcrübəsini ətraflı təsvir edib.

Hətta 1492-ci ildə məşhur səyyah Kristofer Kolumb da Atlantik okeanı üzərində üzərkən qəribə hadisələr müşahidə etdiyini yazmışdı. O, səmada hərəkət edən ulduzlar, uzaqda rəqs edən işıq və sudan göyə doğru qalxan parlaq bir cismin şahidi olduğunu qeyd edib.

Bəziləri Kolumbun sadəcə başqa bir gəminin işığını gördüyünü düşünür, digərləri isə onun fövqəltəbii bir hadisəyə şahidlik etdiyinə inanır.

Nəticə olaraq, Bermud Üçbucağında nələrin baş verdiyi hələ də sirr olaraq qalır. Ancaq görünür ki, insanlar bu müəmmalı ərazinin sirlərini açmaq üçün daha uzun müddət araşdırma aparmaqda davam edəcəklər.

Aynil

Yoxa çıxan gəmilər, itən pilotlar: Bermud Üçbucağında nə baş verir?