Neftin qiyməti 50 dollardan aşağı düşəcək - EİA

ABŞ Enerji İnformasiya İdarəsi (EIA) qlobal neft bazarındakı vəziyyəti nəzərə alaraq, 2025-ci ilin sonuna qədər neft qiymətlərində 10 faizdən çox eniş gözləyir. Hesabata görə, "Brent" markalı neftin bir bareli son rübdə 59 dollara, 2026-cı ilin yazında isə 49 dollara qədər düşə bilər.

 

Sfera.az-ın məlumatına görə, EIA-nın 2025-ci ilin sentyabr ayına aid Qısamüddətli Enerji Baxışı Hesabatında bildirilir ki, yay mövsümündə tələbin azalması və qlobal təklifin artması qiymətlərin aşağı düşməsinə səbəb olacaq.

 

Hazırda "Brent" markalı neft 67 dollar səviyyəsində ticarət olunur.

 

Hesabatda aşağı qiymətlərin OPEC+ və digər istehsalçı ölkələrdə hasilatın azaldılmasına gətirib çıxara biləcəyi, bunun da 2026-cı ilin sonrakı dövrlərində neft ehtiyatlarının artımını ləngidə biləcəyi qeyd olunur.

 

Sənəddə qiymət proqnozlarındakı qeyri-müəyyənliklərə də toxunulub:

 

"Rusiya-Ukrayna müharibəsi, mümkün yeni sanksiyalar və ABŞ-nin ticarət danışıqları neft təklifi və tələbatı üzərində risk yaratmağa davam edir. Eyni zamanda, ilin sonrakı dövrlərində ortaya çıxacaq təklif artıqlığı OPEC+ ölkələrinin istehsal strategiyalarını yenidən nəzərdən keçirməsinə səbəb ola bilər".

 

EIA 2025-ci il üçün orta qiymət proqnozunu yuxarı istiqamətdə yeniləyib və bu il üçün "Brent" markalı neftin orta barel qiymətini 67,80 dollar, ABŞ xam neftinin isə 64,16 dollar səviyyəsində proqnozlaşdırıb. Əvvəlki hesabatda bu rəqəmlər müvafiq olaraq 67,22 və 63,58 dollar idi.

 

Niyaz Hacıyev