Aynur Camalqızı: Bu cür adamları hardan və necə tapırlar və Milli Məclisi hörmətdən salırlar?
19:24 / 30.07.2021
3403
Eldəniz Səlimov adlı deputat polisi döyməsiylə gündəmə gəldi. Maraq üçün Vikipediyada haqqında yazılanlara baxdım. Adam Dağıstanda - diplomları Azərbaycanda tanınmayan - bir universitet bitirib və 2 çağırış parlamentə üzv seçilib. Yeni Azərbaycan Partiyasının da üzvüdür. Bu cür adamları necə tapırlar, hardan tapırlar və Milli Məclisi necə hörmətdən salırlar?!
Sfera.az xəbər verir ki, bu fikirləri Teleqraf Media Qrupunun rəhbəri Aynur Camalqızı öz rəsmi Facebook hesabında deputat Eldəniz Səlimovun polisi döyməsinə münasibət bildirərəkən qeyd edib.
"Bir müddət əvvəl mandatını girov qoyaraq insanlardan pul alan, hazırda həbsdə olan deputat (Rafael Cəbrayılov), sonra Moldovadan başqasının uşağını qaçıran deputat (Ramil Həsən) gündəmi zəbt elədi, indi də polisi döyən deputat.
Qanunverici orqanın üzvü qanun keşikçisini döyür! Tam bir absurd!
Yeni Azərbaycan Partiyası yəqin ki, məsələyə öz siyasi qiymətini verəcək.
30-40 min seçicinin təmsilçisi sözün əsl və yaxşı mənasında fərqlənməlidir, ona səs verən insanların fövqündə durmalıdır. O döyülən polis həm də o deputatın seçicisidir axı. Millət vəkili öz seçicisinə necə əl qaldıra bilər?
Müharibədən çıxmış qalib ölkənin deputatı üstəlik, pandemiya şəraitində beləmi davranmalıdır insanlarla? Bu mənəviyyat sahibləri hansı haqla Cənab Prezidentin komandasında yer ala bilər və almalıdır?
Qalib ölkənin qalib Prezidentinin komandadında belə şəxslərə yer olmamalıdır.
Ümid edirəm ki, ölkənin aparıcı siyasi qüvvəsi olan YAP və MM-in İntizam Komitəsi bu şəxslə bağlı digərlərinə görk olacaq bir addım atacaq".
