Avropa və ABŞ peyvəndlərlə bağlı inqilabi yenilik etməyə hazırlaşır: "Bu olmasa, pandemiya dövrü uzana bilər"
14:22 / 07.05.2021
3153
"Avropa və ABŞ-ın peyvənd şirkətlərinin müəlliflik hüququnun ləğv edilməsi ilə bağlı məsələ qaldırılıb. Ümumdünya Ticarət Təşkilatı da bu təklifi dəstəkləyib. ABŞ Prezidentinin də bu təklifi nəzərdən keçirəcəyi gözlənilir”.
Sfera.az-ın məlumatına görə, bunu iqtisadçı-ekspert Elman Sadıqov deyib. Onun sözlərinə görə, Avropa bəyan edir ki, əgər ABŞ məsələyə müsbət yanaşsa, onlar da müvafiq addımı ata bilərlər:
"Artıq ABŞ və Avropanın 4 peyvənd şirkətlərinin səhmləri müəyyən (1-2% ətrafında) dəyər itiriblər. Dərman və ya peyvənd ixtira edən şirkətlərin həmin dərmanları istehsal etmək üçün bir neçə il müstəsna hüquqları olur. Bu ona görə baş verir ki, dərman şirkətlərinin yeni dərmanlar ixtira etmək üçün stimulları olsun.
Lakin, bir neçə il sonra həmin şirkətlər ya özləri öz müəlliflik hüquqlarını satır, ya da müvafiq prosedurlarla bu hüquqları başqa şirkətlər əldə edirlər. Hazırki vaxt pandemiya ilə əlaqədar olaraq fors-major dövrüdür. Həmin şirkətlər peyvənd istehsalını özləri çatdıra bilmirlər. Peyvəndləmə daha sürətlə getməlidir, həm də bu proses daha uzunmüddətli ola bilər. Bu səbəbdən peyvəndlərin digər şirkətlərin (həmin peyvəndləri ixtira etməyən, lakin hüquqlar verilsə, istehsal edə biləcək) şirkətlərin istehsalına icazə verilməsi məsələsi qaldırılıb”.
Ekspert qeyd edib ki, məsələ həll edilərsə, bu sahədə inqilabi yenilik ola bilər:
"Yəni peyvəndlər daha çox şirkət tərəfindən, deməli daha çox sayda istehsal olunacaq. Əlçatanlıq artacaq. Görünən odur ki, pandemiya dövrünün ömrünü qısaltmaq istəkləri güclənməkdədir. Və yaxud, Hindistan məsələsi narahatlıq doğurub. Yəni müvafiq ciddi və fundamental "addımlar" atılmasa, pandemiya dövrü daha da uzana bilər”.
Günay
Sfera.az
