Döymələrin populyarlığı artsa da, bununla yanaşı sağlamlıq riskləri də gündəmə gəlir. Həkimlər xüsusilə görmə qabiliyyətinə təsir edə bilən nadir, lakin təhlükəli bir xəstəlik barədə xəbərdarlıq edirlər.

Sfera.az xarici mediaya istinadən xəbər verir ki, döymə boyaları yalnız dərini bəzəmir, bəzi hallarda ciddi sağlamlıq problemlərinə də səbəb ola bilər. Oftalmoloqlar döymə ilə əlaqəli Uveit adlı göz xəstəliyinə diqqət çəkirlər. Bu xəstəlik ağır hallarda qismən və ya tam korluğa səbəb ola bilər.

Həkimlərin sözlərinə görə, döymə boyalarının tərkibində müxtəlif kimyəvi maddələr, o cümlədən zəhərli komponentlər ola bilər. Əksər insanlarda bu maddələr ciddi problem yaratmasa da, bəzi hallarda immun sistemi onları təhlükə kimi qəbul edir.

Belə vəziyyətdə orqanizm iltihab reaksiyası yaradır. Bu reaksiya əvvəlcə döymə olunan nahiyədə başlayır, sonra isə bədənin digər hissələrinə, o cümlədən gözlərə yayıla bilər.

Mütəxəssislər bildirirlər ki, bu proses zamanı gözün qoruyucu baryeri zəifləyə bilər. Nəticədə iltihab hüceyrələri gözün müxtəlif strukturlarına, xüsusilə görmədə mühüm rol oynayan orta qat - uveaya daxil olur.

Bu nahiyənin iltihabı uveit adlanır. Onun əsas əlamətlərinə göz ağrısı, qızartı, işığa həssaslıq və görmə pozuntuları daxildir.

Ağır hallarda xəstəlik daha ciddi fəsadlara səbəb ola bilər. Bunlara Qlaukoma və görmə sinirinin zədələnməsi daxildir. Müalicə gecikdirildikdə bu hallar geri dönməz görmə itkisinə gətirib çıxara bilər.

2025-ci ildə aparılan araşdırmada 2023-2025-ci illər arasında dünyada qeydə alınmış 40 belə hal təhlil olunub. Nəticələr göstərib ki, bu xəstəliyin halları əvvəlki illərlə müqayisədə əhəmiyyətli dərəcədə artıb.

Araşdırmalara görə, xüsusilə böyük və qara rəngli döymələrə sahib olan insanlarda risk daha yüksək ola bilər. Xəstəlik həm kişilərdə, həm də qadınlarda eyni tezliklə müşahidə olunur.

Eyni zamanda, immun sistemi həddindən artıq aktiv olan və ya xroniki iltihabi xəstəlikləri olan şəxslər daha çox risk altındadır. Bu faktorlar arasında Dağınıq skleroz, bəzi artrit növləri və bağırsaq iltihabları göstərilir.

Müalicə mümkündür, lakin hər zaman tam effekt vermir. Yüngül hallarda steroid tərkibli göz damcıları istifadə olunur. Daha ağır hallarda isə dərmanlar birbaşa gözə yeridilə və ya immun sistemi zəiflədən preparatlar təyin oluna bilər.

Statistikaya görə, bu diaqnozu alanların təxminən 75 faizində müvəqqəti görmə zəifləməsi, 17%-ində isə daimi görmə itkisi müşahidə olunur. Bəzi hallarda katarakta və qlaukoma kimi əlavə problemlər də yaranır.

Həkimlər tatu etdirdikdən sonra sağlamlıq vəziyyətinə diqqətlə yanaşmağı tövsiyə edirlər. Əgər tatu nahiyəsində uzunmüddətli şişkinlik və ya iltihab yaranarsa, həmçinin görmə ilə bağlı problemlər ortaya çıxarsa, dərhal həkimə müraciət etmək vacibdir.

Mütəxəssislər qeyd edirlər ki, bu xəstəliyin yaranma mexanizmi hələ tam öyrənilməyib. Lakin tatuların getdikcə daha da yayılması gələcəkdə belə halların artmasına səbəb ola bilər./lent.az

Döymə etdirənlər kor ola bilər - XƏBƏRDARLIQ