Astroloqların fikrincə, bəzi bürclərin həyatında uğursuzluq və çətinliklər daha çox olur. Sfera.az xəbər verir ki, bu, onların düşüncə tərzi, qərar vermə üsulu və emosional yanaşmaları ilə bağlıdır. Onlar bəzən çox istəsələr də, işləri planlaşdırdıqları kimi getmir. Gəlin, işləri həmişə tərs gətirən bürclərə nəzər salaq. Balıqlar Balıqlar çox həssas və xəyalpərəstdirlər. Onlar bəzən real həyatı qəbul etməkdə çətinlik çəkirlər. Bu səbəbdən planlaşdırdıqları işlər çox vaxt istədikləri kimi alınmır. Həddindən artıq güvənmək və tez təsirlənmək də onların şansını azaldır. Oğlaq Oğlaqlar ciddi, çalışqan və hədəfli insanlardır. Amma hədsiz məsuliyyət hissi onları bəzən yorur və yanlış qərarlar verməyə məcbur edir. Çox düşündükləri üçün fürsətləri qaçırır, işləri tərs gətirirlər. Oxatan Oxatanlar optimistdir, lakin bəzən həddən artıq riskə meylli olurlar. Plan qurmaqda zəifdirlər, bu da onların uğurlarını azaldır. Çox vaxt düşündükləri istiqamətdə deyil, tam əks yolda özlərini tapırlar. Qız Qız bürcü insanları dəqiqliyi və təmizliyi sevsələr də, hər şeyə həddindən artıq müdaxilə edirlər. Detallarda ilişib qaldıqları üçün böyük mənzərəni görmür, bu da işlərinin tərs gətirməsinə səbəb olur. Xərçəng Xərçənglər emosional bürc olduğuna görə tez ruhdan düşürlər. Onların həyatında xırda uğursuzluqlar belə böyük faciə kimi görünür. Bu səbəbdən işləri tez-tez planlaşdırdıqları kimi getmir. (Metbuat.az)

Hazırda ali təhsil müəssisələrində təhsil alan tələbələrin üzləşdiyi əsas problemlərdən biri yataqxana məsələsidir. Tələbə sayının artması fonunda mövcud yataqxanaların tutumu kifayət etmir və bu, tələbələrin yaşayışla bağlı ciddi çətinliklərini gündəmə gətirir. Məsələ ilə bağlı Sfera.az-a açıqlama verən təhsil eksperti Kamran Əsədov bildirib ki, Azərbaycanda tələbələrin sosial rifahı ilə bağlı ən ciddi məsələlərdən biri onların yataqxana ilə təmin olunmasıdır: Son illərdə ali təhsil müəssisələrinə qəbul olunan tələbələrin sayında artım müşahidə olunsa da, mövcud yataqxana fondunun bu artımı qarşılamadığı açıq şəkildə görünür. Rəsmi statistikaya görə, ölkədə hazırda 180 mindən çox tələbə təhsil alır, onların təxminən 60 mini dövlət sifarişi əsasında oxuyur. Lakin Elm və Təhsil Nazirliyinin məlumatına görə, istifadədə olan yataqxana yerlərinin sayı 7 8 min arasında dəyişir. Bu isə tələbələrin cəmi 10 faizinin yataqxana ilə təmin olunması deməkdir. Beləliklə, tələbələrin böyük əksəriyyəti, xüsusilə də bölgələrdən gələnlər, kirayə mənzillərdə qalmaq məcburiyyətindədir. Bu vəziyyət sosial ədalət prinsipinə və təhsilalanların hüquqlarına təsir göstərir . Ekspert Təhsil haqqında Qanunun 35-ci maddəsini xatırladaraq qeyd edib ki, tələbələrin sosial-məişət şəraitinin yaxşılaşdırılması dövlətin vəzifələrindən biridir: Bu hüquqi norma tələbələrin yalnız təhsil mühitində deyil, həm də yaşayış şəraitində dövlət dəstəyinə arxalana bilməsini nəzərdə tutur. Əlavə olaraq, Azərbaycan Respublikasının Prezidentinin 2019-cu il tarixli sərəncamı ilə bir sıra ali məktəblərin yataqxana binalarının tikintisinə və əsaslı təmirinə vəsait ayrılıb. Bu qərarlar göstərir ki, dövlət mövcud vəziyyətin fərqindədir və problemin həlli istiqamətində ardıcıl addımlar atır. Müsbət tərəf ondan ibarətdir ki, son illərdə müasir tipli yeni yataqxana kompleksləri istifadəyə verilib. Məsələn, ADA Universitetində inşa olunan yataqxana həm yerli, həm də xarici tələbələrin yaşayışı üçün nümunəvi şərait yaradıb. Azərbaycan Dövlət Pedaqoji Universitetinin yeni yataqxanası isə kitabxana, laboratoriya, idman zalı və müasir avadanlıqlarla təchiz olunub. Bu nümunələr göstərir ki, Elm və Təhsil Nazirliyi problemi yalnız say baxımından deyil, həm də keyfiyyət baxımından həll etməyə çalışır. Müasir yataqxana modelləri tələbələrə yalnız yaşayış deyil, həm də təhsil və sosial mühit formalaşdırır. Mənfi tərəf isə hələ də əsas kütlənin ehtiyaclarının ödənilməməsi ilə bağlıdır. Kirayə mənzillərin bahalığı səbəbindən bir çox tələbə dərsdən sonra işləməyə məcbur qalır. Bu isə onların təhsil keyfiyyətinə mənfi təsir göstərir. Hətta bəzi hallarda tələbələr valideynlərinin maliyyə imkanlarının məhdudluğu səbəbindən təhsildən imtina etməli olurlar . Müsahibimiz dünya təcrübəsi ilə müqayisə etdikdə Azərbaycanın bu sahədə geri qaldığını da vurğulayıb: Türkiyədə KYK (Kredi və Yurtlar Kurumu) sistemi vasitəsilə tələbələrin 70 faizdən çoxu dövlət yataqxanaları ilə təmin olunur. Almaniyada Studentenwerk qurumları tələbələrin təxminən 40 faizini yataqxanalarla təmin edir. Azərbaycanda isə bu göstərici 10 faizi keçmir. Lakin pozitiv məqam odur ki, son illərdə dövlətin siyasətində tələbə şəhərciklərinin salınması, universitetlərin balansına yeni binaların verilməsi prioritet istiqamət kimi müəyyən olunub. Əgər planlaşdırıldığı kimi, qarşıdakı illərdə Bakı və regionlarda yeni yataqxana kompleksləri tikilərsə, tələbələrin sosial şəraiti xeyli yaxşılaşacaq. Bu, həm də Azərbaycanın beynəlxalq ali təhsil məkanında rəqabət qabiliyyətini artıracaq. Çünki xarici tələbələrin ölkəyə marağında yaşayış şəraitinin böyük rolu var. Beləliklə, Elm və Təhsil Nazirliyinin hazırda həyata keçirdiyi layihələr təqdirəlayiqdir və problemin mərhələli şəkildə həllinə yönəlib. Konkret nümunə kimi ADNSU-da TİT layihəsi çərçivəsində istifadəyə verilən yataqxananı, BDU-da açılan tələbə evini və ADAU-da fəaliyyət göstərən müasir kompleksləri göstərmək olar. Bu obyektlər həm keyfiyyət, həm də funksionallıq baxımından dünya standartlarına cavab verir. Nəticə etibarilə, tələbələrin yataqxana ilə təmin olunması məsələsində çatışmazlıqlar hələ də qalır. Lakin dövlətin mövqeyi və atdığı addımlar gələcəkdə vəziyyətin xeyli yaxşılaşacağını göstərir. Elm və Təhsil Nazirliyinin bu istiqamətdə gördüyü işlər tərifəlayiqdir və təhsilin keyfiyyətinə dolayısı ilə dəstək verir . Niyaz Hacıyev Sfera.az

Bu gün Azərbaycan məktəblərində yeni tədris ili başlayıb. Elm və Təhsil Nazirliyinin məlumatına görə, 2025 2026-cı tədris ilində ümumilikdə 1,6 milyona yaxın şagird məktəbə gedəcək. Onların təxminən 130 minini birinci sinif şagirdləri təşkil edir. Sfera.az xəbər verir ki, birinci sinfə qəbul edilən uşaqların sayı tədricən azalmaqdadır. Bunu son illərin statistikası göstərir. Belə ki, 2019 2020-ci tədris ilində 164 mindən çox uşaq birinci sinfə yazılmışdı. 2020 2021-ci ildə bu rəqəm 156 minə, 2021 2022-ci ildə isə 153 minə qədər enib. 2022 2023-cü ildə birinci sinfə qəbul olunanların sayı təxminən 152 min olub. 2024 2025-ci tədris ilində Azərbaycanda ümumi təhsil müəssisələrində 1 704 065 nəfər təhsil alıb. Bu rəqəmin 134 600-ü birinci sinif şagirdləri, 90 732-si isə məktəbəhazırlıq qruplarında təhsil alan uşaqlardır. Bu il açıqlanan 130 minlik göstərici də əvvəlki illərlə müqayisədə azalma tendensiyasını təsdiqləyir. Bu azalma bir neçə amillə bağlıdır. Əvvəla, doğum göstəricilərində uzunmüddətli eniş müşahidə olunur. Dövlət Statistika Komitəsinin məlumatlarına görə, son illərdə əhalinin təbii artımı əvvəlki onilliklərlə müqayisədə aşağıdır. Bununla yanaşı, miqrasiya prosesləri və regionlar üzrə əhalinin paylanmasındakı dəyişikliklər də məktəbyaşlı uşaqların sayına təsir göstərir. Bununla belə, ümumi məktəblilərin sayı hələ də yüksəkdir. 2019 2020-ci illərdə ümumilikdə 1 milyon 500 minə yaxın şagird təhsil alırdısa, bu gün rəqəm 1,6 milyona yaxınlaşır. Bu isə onu göstərir ki, ümumi şagird kontingenti böyük qalsa da, birinci siniflər üzrə qəbulda ardıcıl azalma meyli özünü göstərir. Beləliklə, hazırkı statistika göstərir ki, birinci sinfə gedən uşaqların sayı ildən-ilə azalır. Demoqrafik dəyişikliklər bu prosesin qarşıdakı illərdə də davam edə biləcəyini deməyə əsas verir. Firuzə Əliyeva Sfera.az