120 min azərbaycanlı Rusiyadan qayıtsa... - \"İşsizlər ordusu\"nun yaranmaması üçün hansı addımlar atılacaq?

 

Bəs bu qədər insanın qayıdışı Azərbaycanda hansı problemlər yarada bilər? 

Bu barədə Sfera.az-a açıqlamasında iqtisadçı ekspert Natiq Cəfərli bildirdi ki, Rusiyada leqal və qeyri-leqal yaşayaraq orada fəaliyyət göstərən azərbaycanlılar illərdir Azərbaycanın iqtisadi həyatında da mühüm rol oynayırlar:

"Onlar Rusiyada qazandıqları vəsaitin müəyyən hissəsini Azərbaycanda qalan ailələrinə göndərirdilər və həmin vəsait burada istehlak olunurdu.  Bu da öz növbəsində iqtisadi aktivliyin yaranmasına müəyyən töhfə verir.  Lakin pandemiya ilə əlaqədar Rusiyadan Azərbaycana göndərilən vəsaitin həcmi də azaldı.  Bunun özü də ölkəmizdə iqtisadiyyatın çarxının mənfi istiqamətə yönəlməsinə təsir edən amillərdən birinə çevrildi.  Yeni yanaşma fonunda 120 minə yaxın qeyri-leqal yaşayan azərbaycanlının Rusiyadan çıxarılması qərarı verilsə, onların böyük hissəsinin Azərbaycana geri dönüşü gözlənilir”. 

Belə vəziyyət isə həmsöhbətimizə görə, ölkədə işsizlik ordusunun, sosial gərginliyin artmasına səbəb ola bilər: 

"Zatən ölkəmizdə pandemiya ilə bağlı olaraq işsizlər ordusu xeyli dərəcədə artıb. Rəsmi rəqəmlərdə pandemiyadan öncə 90 700 işsiz vardısa, sonradan bu rəqəm 600 minə yaxın insana işsizlik müavinətinin verilməsilə nəticələndi. Deməli, işsizlik məsələsində ciddi problemlər var. Rusiyadan həmin 120 min qeyri-leqal miqrantın hamısının qayıdacağını düşünmürəm.  Güman ki, bir hissəsi Rusiyada leqal şəkildə qalmağın yollarını arayıb tapacaq”.

Problemi önləmək üçün isə N. Cəfərlinin fikrincə, kiçik və orta sahibkarlığın inkişafına yönəlik proqramlar reallaşdırılmalıdır: 

 

"Azərbaycan hökuməti indidən işsizliyin artmasının qarşısını almaq yönündə müəyyən addımlar atmalıdır.  Kiçik və orta sahibkarlığa dəstək üçün bəzi proqramlar işlənməlidir ki, geri dönmək məcburiyyətində olan soydaşlarımızın işlə təminatında problemlər yaşanmasın.  Çünki bu məsələnin həllinin tapılmaması bir müddətdən sonra sosial gərginlik yarada bilər”.