"Yeni vergi sisteminə keçidlə əlaqədar tikinti şirkətləri mənzillərin qiymətində müəyyən artımlara getməyə məcbur olacaqlar”.

Sfera.az-a açıqlamasında bu sözləri 2020-ci ilin 1 yanvar tarixindən bina tikintisi fəaliyyəti ilə məşğul olan şəxslərin sadələşdirilmiş vergi ödəyicisi olmaq hüququnun ləğv edilməsi və həmin şəxslər tərəfindən vergi öhdəliklərinin vahid metodla - ƏDV və mənfəət vergisinin ödəyicisi kimi yerinə yetirməyə keçidlə əlaqədar baş verəcək prosesin mənzillərin qiymətinə təsirinin olub-olmayacağı məsələsinə aydınlıq gətirərkən Azərbaycan Rieltorlar Assosiasiyasının icraçı direktoru Elnur Azadov deyib:

"Atılan addım tikinti şirkətlərinin maya dəyərinə mənfi təsir etsə, şirkətlər qiymətləri bahalaşdıra bilərlər. Bu da son nəticədə daşınmaz əmlak bazarında qiymətlərin yüksəlməsinə təsir edəcək. Təbii ki, sözügedən qaydanın tətbiqi nəticəsində inşaat materiallarının alınması zamanı şirkətlər əlavə xərcə düşməli olacaq. Ona görə ki, qara bazarda olan inşaat materiallarının qiyməti əslində nisbətən ucuzdur”.

Ekspert düşünür ki, sözügedən proses nəticəsində kiçik inşaat layihələrində qiymətlər qalxacaq: "Amma inşaatın həcmi böyükdürsə, bu kimi layihələrdə maya dəyəri nisbətən aşağı olur. Bu kimi iri həcmli layihələrdə tikinti şirkətləri gəlirdən itirməyəcək.Bununla belə sözügedən təcrübə hələ ki, Azərbaycanda olmadığından dəqiq söz deməkdə çətinlik çəkirik. Yeni inşaat normativlərilə əvvəlki inşaat həcmi təxminən 30 faiz aşağıdır. Məsələn. əvvəllər 1 hektar torpaqda tikinti şirkətləri sərbəst 40-50 min kv.m-lik inşaat işləri həyata keçirə bilirdi. İndiki normativlə isə 25-26 min kv.m-dən artıq inşa edə bilmirlər. Deməli, inşaatın həcmi azalır. Həcmin azalması fonunda da tikinti şirkətləri daha az qazanc əldə edir. Üstəlik yeni vergi sisteminə cəlb olunma metodu tikinti şirkətlərinə, onların inşa etdikləri binalarda maya dəyərinə təsir edəcək. Ona görə də güman ki, yeni vergi sisteminə keçilməsilə tikinti şirkətləri tikdikləri mənzillərin qiymətində müəyyən artımlara getməyə məcbur olacaqlar. Bu da onu göstərir ki, baş verəcək hadisə ümumi bazara təsirsiz ötüşməyəcək. Sadəcə, təsirin həcmini müəyyən etmək hələlik mümkün deyil, çünki təcrübə yoxdur”.

Elçin

Sfera