İstanbulun Qaziosmanpaşa məhəlləsində 5 mərtəbəli binanın zirzəmisində qəfil yanğın başlayıb. Tezliklə bütün binanı qara tüstü bürüyüb. Üçüncü mərtəbədə köməksiz qalan azərbaycanlı, 6 aylıq hamilə olan Günel Hüseynova qonşuların vasitəsilə xilas ola bilib.

Sfera.az xəbər verir ki, hadisə bu gün səhər saatlarında baş verib. 22 yaşlı G. Hüseynova mənzilinə qara tüstünün dolduğunu görərək təşvişə düşüb. Pəncərəyə yaxınlaşıb və qonşulardan kömək istəyib. 5-ci mərtəbədə yaşayan qonşular pəncərədən aşağı düşmək üçün ona ip uzadıblar. İpdən tutan qadın özünü aşağıda qonşuların tutduğu yorğanın üzərinə atıb. Xoşbəxtlikdən ana və bətnindəki körpə zərər çəkməyib.

G. Hüseynovanın həyat yoldaşı Adil Kazımov yanğın baş verən zaman evdə olmayıb. Ona zəng edərək yanğın barəsində məlumat verilən kimi özünü evə çatdırıb: "Hazırda özünün və uşağın vəziyyəti normaldır. Qoxmuşdu, mən görəndə ağlayırdı. Bizim evin yandığını deyirdi, amma yanğın aşağı mərtəbədə olub. Onu xilas edənləri tanıyıram, amma həyəcandan seçə bilmədim”, - A. Kazımov bildirib. (virtualaz.org)