Azərbaycan prezidenti İlham Əliyev 2019-cu ilin dördüncü kvartalı ərzində Moldovaya rəsmi səfər edə bilər.

Virtualaz.org xəbər verir ki, belə dəvəti Moldova prezidenti İqor Dodon Azərbaycanın Kişnyovdakı səfiri Qüdsi Osmanova çatdırıb.

Dodon səfirlə görüşü haqda özünün Facebook səhifəsində məlumat və video paylaşıb.  Bildirib ki, görüş zamanı ikitərəfli münasibətlərə dair məsələlər, o cümlədən ticarət-iqtisadi əlaqələr müzakirə olunub.

"Məmuniyyətlə qeyd etdik ki, Moldovada Azərbaycan kapitalı ilə 130-a yaxın müəssisə var, amma ikitərəfli münasibətlərin potensialından yetərli istifadə olunmadığını da göstərdik”,-Dodon bildirib.

Dövlət başçısı qeyd edib ki, iki ölkə arasında sosial-humanitar sahədə əməkdaşlıq ayrıca nəzərdən keçirilib. "Bu kontekstdə Azərbaycan tərəfinə Moldova Respublikasına və hər şeydən əvvəl Qaqauz muxtariyyətinə göstərdiyi köməyə görə ayrıca minnətdarlıq etdim”,-Dodon vurğulayıb.

Moldova prezidenti xatırladıb ki, Heydər Əliyev Fondunun dəstəyi ilə Çadır-Lunqada uşaq yaradıcılıq Mərkəzinin tikintisi yekunlaşmaq üzrədir. "Layihənin reallaşması mənimlə Azərbaycan prezidenti İlham Əliyev arasında 2017-ci ildə əldə edilmiş şəxsi anlaşma sayəsində mümkün olub. Yekunda cənab Osmanov vasitəsilə İlham Əliyevə 2019-cu ilin IV kvartalında Moldovaya rəsmi səfər etmək üçün dəvət göndərdim”,-İqor Dodon əlavə edib.