Sfera.az bildirir ki, liderlər görüş zamanı Türkiyə və Rusiya ilə münasibətlər məsələsinə toxunub. Merkel çıxışı zamanı Türkiyə ilə fikir ayrılıqlarının mövcud olduğunu, lakin bəzi məsələlərdə dövlətlərin bir-birinə ehtiyac duyduqlarını vurğulayıb. "Məsələn, Liviyanın gələcəyi, Suriya məsələsi və.s” , - deyə Almaniya kansleri əlavə edib.

O həmçinin Rusiyanın Almaniya üçün böyük bir sınaq olduğunu deyib: 

"Bu ölkə həm də Avropa Birliyinin ən böyük qonşularından biridir. Rusiyanın hibrid hücumlarına məruz qalırıq. Lakin AB-nin təhlükəsizliyini təmin etmək istəyiriksə, nə qədər çətin olsa da, Rusiya ilə əlaqələri davam etdirməliyik”.

Fransa prezidenti Emmanuel Makron da Merkellə həmfikir olduğunu ifadə edib. O qeyd edib ki, Türkiyə ilə münasibətlərdə Avropa Birliyi üzvləri olan Yunanıstan və Kipr Respublikasının mövqeləri ilə yanaşı,  AB-nin Şərqi Aralıq dənizi, Liviya və Qafqazdakı strateji mövqeyi də nəzərə alınmalıdır.

Qeyd edək ki, Avropa İttifaqı Liderlər Zirvəsində Türkiyə ilə son zamanlar gərginləşən münasibətlərin müzakirə ediləcəyi gözlənilir. Zirvə 24-25 iyun tarixində baş tutacaq.