\"Yoluxmadakı artımı məktəblərin açılması ilə əlaqələndirmək absurddur\" - Professor
10:27 / 19.10.2021
600
"COVİD-19-un hazırda müşahidə olunan artım dinamikası nisbidir və fəsli xarakter daşıyır”.
Sfera.az bildirir ki, bunu tibb elmləri doktoru, professor Musa Qəniyev deyib. Onun sözlərinə görə, oktyabrın birinci ongünlüyündən başlayaraq, insanlar arasında tezliyi artan yuxarı tənəffüs yollarının katarı, o cümlədən halsızlıq, temperaturun yüksəlməsi və sair kimi əlamətlərin 95% nisbətində koronavirusla heç bir əlaqəsi yoxdur:
"Bunlar insan orqanizminə xüsusi qorxu törətmək qüdrətində olmayan, hər il təkrar-təkrar yoluxduğumuz, adenovirus təbiətli fəsli infeksiyalardır. Hazırda xəstəlikdən yoluxub-sağalmış, eləcə də vaksinasiya olunmuş insanların toplam sayı 90%-in üstü səviyyəsində olduğuna görə, insanlar COVİD-19-a yoluxsa belə, onu yüngül, adi fəsli viral infeksiyalardan biri kimi keçirməlidir”.
Mütəxəssis son günlər sosial şəbəkələrdə koronavirusun artımını ənənəvi tədris sisteminə keçidlə əlaqələndirənlərdən də söz açıb:
"Əvvəla, tədris müəssisələrinin açılması sentyabrın 29-na təsadüf edir. Həmin gün yoluxma 842 nəfər idi. Oktyabrın 17-də yoluxma 1892 nəfər olub. Cəmi 2,2 dəfə artıq. Koronavirusun inkubasiya dövrü 2-14 gündür. 90% hallarda bu müddət 5,2 gün təşkil edir. İnfeksiyanın 14 gündən sonra başlama ehtimalı yalnız 3,8%-dir. Yəni 100 yoluxana 3-4 nəfər. Odur ki, hazırkı artımı ali və ya orta məktəblərin açılması ilə əlaqələndirmək absurddur.
Bu artım nisbidir, fəsli xarakterlidir, yəni qanunauyğunluqdur. Buna görə hətta narahatlığa belə, heç bir əsas yoxdur. Təhsil sistemində kiminsə istəyi və arzusu ilə məhdudiyyətlərin tətbiqi yolverilməzdir və cinayətdir. Əksinə, gigiyenik qaydalara əməl olunmasına nəzarət gücləndirilməklə, bütün sahələrdə məhdudiyyətlər qeyri-şərtsiz olaraq aradan qaldırılmalıdır”.
Günay Rəsulqızı
Sfera.az