“Yerdə həyat məhv olacaq, Marsdakı kimi…” – 50 dərəcə istilik nə vəd edir?
13:32 / 11.08.2021
2426
"Bəşəriyyət üçün təhlükəli həddə çatdıqda təkcə buzlaqlar
əriməyəcək. Canlı orqanizmlər bütünlüklə və avtomatik şəkildə məhv olacaq”.
Bu sözləri Sfera.az-a açıqlamasında ETSN-nin Milli
Hidrometeorologiya Xidmətinin rəis
müavini Rafiq Verdiyevin 30-40 ildən sonra havanın temperaturunun 48-50 dərəcəyə
qədər yüksələcəyi haqda iddiasına münasibət bildirərkən, AMEA-nın Coğrafiya
institutunun əməkdaşı Ənvər Əliyev deyib:
"Yaşadığımız Yer də Mars planetinin taleyini
yaşayacaq. Vaxtilə Marsda da yaşayış olduğunu düşünürəm. Ancaq sonradan günəş
temperaturunun düşməsilə bu planet məhv olub. Belə vəziyyətdə atmosfer
parçalanacaq, su kütləsi buxarlanacaq. Dünyanı yanğınlar bürüyəcək. 50 dərəcə
temperaturda insan da yaşaya bilməyəcək. Bu isə planetimizin sonu olacaq”.
Həmsöhbətimizə görə, 50 dərəcə temperaturun olması ümumdünya
fəlakəti, dünyanın sonu deməkdir:
"Temperaturun bir neçə dərəcə qalxması nəticəsində
planetimizdə buz qatı olmayacaq, büsbütün əriyəcək. Belə vəziyyətdə dünya
okeanı azı 15-20 metrə qədər qalxacaq. Ümumiyyətlə, okean suları 7 metrə qədər
qalxsa, Xəzər dənizi də 35 metrəyə qədər yüksələcək. Çünki bu halda Rusiyanın cənubundakı
çökəklik suları Xəzərə dolacaq. Dünyada isə dəniz səviyyəsindən aşağıda yerləşən
bir çox ölkələr, şəhərlər su ilə örtüləcək. Nəticədə tepmeraturun 50 dərəcəyə
yüksəlməsi ümumdünya fəlakətinə gətirib çıxaracaq”.
Rüfət SULTAN