Bununla bağlı Sfera.az-a açıqlama verən deputat Azər Badamov Türkiyədə meşə yanğınlarının baş alıb getməsinə təəssüfləndiyini vurğulayıb:

"Təbii ki, yanğınlar Türkiyənin meşə təsərrüfatına, ekologiyaya, insanlara böyük ziyanla nəticələnir. Biz qardaş ölkə olaraq kədərlənirik, baş verən hadisələrdə dünyasını dəyişmiş insanların yaxınlarına da başsağlığı veririk. Azərbaycan hər zaman Türkiyənin yanındadır, biz bir millət, iki dövlətik. Türkiyənin acısı acımız, sevinci sevincimizdir. Bu baxımdan indiki halda qardaş ölkənin Azərbaycanın yardımına ehtiyacı varsa, hər formada, o cümlədən yanğınsöndürənlərlə və ya ümumiyyətlə bütün imkanlarla biz dəstək verməyə hazırıq. 

Bununla bağlı hökumətlərarası razılaşma olmalıdır. Düşünürəm ki, Azərbaycan yanğınsöndürmə proseslərində də iştirak edə bilər. Yəni Azərbaycan öz yardım təklifini edib, əgər Türkiyənin fəlakətin qarşısını almağa gücü yetərli deyilsə, biz əlbəttə, onların yanında olacağıq”.

 

Millət vəkili Aydın Mirzəzadə saytımıza danışarkən bildirib ki, Azərbaycan- Türkiyə münasibətlərinin dərinliyini və genişliyini nəzərə alaraq, hər bir formada qardaş ölkənin yanında olmalıyıq:

"Bu gün meşə yanğınları ilə bağlı problemin həllində hesab edirəm ki, Azərbaycan Türkiyəyə maksimum yardım göstərəcək. Hər halda, Türkiyə hökuməti yanğınların səbəbi ilə əlaqəli qənaətini bölüşəcək. İstədiyimiz ondan ibarətdir ki, yanğınlar tezliklə söndürülsün və Türkiyə bu bəladan qurtarsın”.

Deputat Fazil Mustafa isə Türkiyədəki yanğınların can və mal itkisinə səbəb olduğunu xatırladıb:

"Bunu mənfur PKK-nın törətdiyi şübhələri ciddidir. Bilmirəm necə yardım edə bilərik? Əgər yanğından zərər çəkənlərə maddi dəstək vermək düşünülərsə, açılan hesaba imkanı çatanlarımız gücü yetən dəstəyi verməlidirlər. Allah ölənlərə rəhmət etsin, zərərçəkmiş insanlara da səbr versin! Türkiyə dövləti ilə, xalqı ilə hər zaman güclüdür. Bu sınaqdan da salamat çıxacaqlar. Dualarımız Türkiyə ilədir, qardaşlarımızladır”.

Qeyd edək ki, yanğın zamanı ölənlərin sayı 4 nəfərdir. Türkiyənin Manisa əyalətində meşə yanğınlarını qəsdən törətməkdə şübhəli bilinən PKK terror təşkilatının iki üzvü saxlanılıb. Həmin şəxslərin Suriya əsilli qardaşlar olduğu deyilir.

Baş verən hadisələrlə bağlı Azərbaycan Respublikasının Prezidenti İlham Əliyev Türkiyə Respublikasının Prezidenti Rəcəb Tayyib Ərdoğana başsağlığı verib.