Azərbaycanda yaşlı insanların, təqaüdçülərin öz asudə vaxtlarını mənalı keçirməsinə dəstək olacaq bir platforma varmı?

Məhz belə bir platformanın olmaması dörd il öncə Nərmin Qəniyeva və Natəvan Yusifovanın "Üçüncü bahar” layihəsini başlamağa ruhlandırıb.

"Üçüncü bahar” təşəbbüsü haqqında Əkinçiyə danışan Nərmin Qəniyeva deyir ki, burada yaşlı insanların maraq dairəsinə görə maarifləndirici, sağlamlıq və yaradıcılıq istiqamətində fəaliyyətlər təklif olunur. Layihə çərçivəsində sıfırdan rəsm çəkməyi öyrənmək də mümkündür, səyahət üçün ingilis dili kurslarına qatılmaq da.

Arzuların, istəklərin yaşı olmur deyən Nərmin onların layihəsinin əsas məqsədinin yaşlıların daha fəal həyat tərzi keçirməsinə kömək etmək olduğunu bildirir. Çünki xoşbəxt valideyn, xoşbəxt nənə, xoşbəxt baba həm də xoşbəxt övlad, xoşbəxt nəvə, xoşbəxt ailə deməkdir.