Xarici İşlər Nazirliyində kadr dəyişikliyi reallaşıb.

Sfera.az-ın məlumatına görə, Nadir Hüseynov Xarici İşlər Nazirinin müavini vəzifəsindən azad edilib.

Onun yerinə isə Azərbaycan Respublikası Birinci vitse-prezidentin Katibliyinin rəisinin müavini Fariz Rzayev təyin edilib.

Xatırladaq ki, bir müddət öncə saytımızda Xarici İşlər Nazirinin müavini Nadir Hüseynovun və Avropa Birliyi ölkələrindəki səfirlərlə iş sektorunun rəhbəri Elxan Azayevin fəaliyyətlərinin araşdırılması haqda məlumat vermişdik. Nadir Hüseynovun tutduğu vəzifədən azad edilməsi isə Elxan Azayevin də hədəfə gələcəyini düşünmək üçün əsaslar yaradır.

Qeyd edək ki, o həm də Xarici İşlər Nazirliyi Həmkarlar İttifaqı komitəsinin rəhbəridir.

Orxan

Sfera.az

***

Dövlət Təhlükəsizlik Xidmətinin XİN-də həyata keçirdiyi anti-korrupsiya əməliyyatı ictimaiyyətə indiyə qədər bəlli olmayan bir çox həqiqətlərin üzərinə işıq saldı. İstintaqın gedişində daha ciddi nöqsan və pozuntuların üstünün açılacağı isə sirr deyil.

Sfera.az-ın redaksiyasına Avropa Birliyi ölkələrindəki səfirlərlə iş sektorunun rəhbəri, eləcə də Xarici İşlər Nazirliyi Həmkarlar İttifaqı komitəsinin rəhbəri Elxan Azayevin müəllifliyi ilə həyata keçirilmiş tikinti "əməliyyatları" haqda ilginc faktlar daxil olub.

Həmin məlumatları təqdim edirik:

Qeyd edək ki, Elxan Azayev nazir Elmar Məmmədyarovun ən inanılmış kadrlarından sayılır. Görünür, elə buna görə də Məmmədyarov 2008-ci ilin sentyabrında Elxan Azayevlə tikinti biznesinə qərar verir və "DİPLOMAT 2008" Mənzil Tikinti Kooperativini qeydiyyatdan keçirir. Şirkət 25 manat nizamnamə kapitalı ilə Vergilər Nazirliyinin Bakı Şəhəri Lokal Gəlirlər Baş İdarəsində qeydiyyata alınıb. Hüquqi ünvanı Nəsimi rayonu, Süleyman Rüstəm küçəsi ev 33 A, 53-dür. Ofisi XİN-in Konsulluq İdarəsinin keçmiş binası ilə üzbəüzdə yerləşir.