"Pandemiya ilə mübarizədə müsbət nəticə əldə edən dövlətlərin təcrübələrinə nəzər saldıqda, bu sahədə effektivliyi təmin edən bir neçə məsələnin olduğunu görürük ki, bunlar da vətəndaşların özlərindən asılıdır. Təbii ki, biz bütün məsuliyyətin vətəndaşın üzərində olduğunu demirik. Lakin vətəndaşların özündən asılı olan məsələlər də çoxdur. Virusla mübarizədə iki vacib məqam – marketlərdə, ictimai nəqliyyatda və eləcə də müxtəlif ictimai yerlərdə sosial məsafənin gözlənilməsi və qoruyucu tibbi maskadan istifadə edilməsi məsələsidir. Bunlar da bilavasitə vətəndaşların özlərindən asılıdır”. 

Ekspert bildirir ki, Azərbaycanda koronavirus yeni-yeni yayılmağa başladıqda rəsmi qurumlar tibbi maskadan istifadənin vacibliyini vurğulasa da, müxtəlif sosial şəbəkələrdə maskadan istifadənin təhlükəli olması ilə bağlı yanlış məlumatlar paylaşılırdı:

"Bu kimi məlumatlar insanları çaşdırdı və bununla da, maskadan istifadədən imtina edənlər oldu. Nəticədə vəziyyət virusun yayılmasına əlverişli mühit yaratdı”. 

A.Allahverənov ictimai nəqliyyatda tibbi maskadan istifadə ilə bağlı çağırışların edildiyinə və burada vətəndaş məsuliyyətinin əsas rol oynadığına diqqət çəkib:

"Hazırda metroların bağlanması ilə avtobuslarda sərnişinlər arasında sıxlıqlar müşahidə olunur. Bu zaman sərnişinlərin maskadan istifadə etməsi ilə bağlı məsuliyyət sürücülərin üzərinə qoyulur. Sürücülərdən tələb olunur ki, avtobus salonunda olan sərnişinlərin tibbi maskadan istifadəsinə, sosial məsafənin gözlənilməsinə nəzarət etsinlər. Lakin bu, bütün hallarda sərnişinlərin özlərindən asılı olan haldır. Çünki sürücülərin də bu formada məsələyə müdaxilə etməsi xoşagəlməz hallara gətirib çıxarır. Məsələn, bugünlərdə sosial şəbəkələrdə belə hadisə ilə bağlı video paylaşılıb. Avtobus sürücüsü sərnişinin tibbi maskadan istifadə etməsini təkidlə bildirdikdə ona qarşı zor tətbiq edilib. Bu da yolverilməz bir haldır. Buna görə də insanlar öz məsuliyyətini dərk etməli, özləri avtobus salonlarında tibbi maskadan istifadə etməyən şəxsləri qaydalara əməl etməyə çağırmalı və məsələyə yerində etirazlarını bildirməldirlər”.

Xatırladaq ki, Bakı Nəqliyyat Agentliyi avtobuslarda qoruyucu tibbi maskadan istifadə edilməsi və sosial məsafəyə riayət edilməsi ilə bağlı mütəmadi olaraq çağırışlar edir və məlumatlandırıcı tədbirlər görür. Qurum tibbi maskadan istifadə etməyən sərnişin olduqda, avtobusların ümumiyyətlə hərəkət etməmələri ilə bağlı sürücülərə təlimat verib.