Vaşinqton Türkiyə vasitəsilə Azərbaycanda möhkəmlənmək istəyir - Politoloq
11:14 / 08.06.2021
1559
"Baydenlə Ərdoğanın görüşündə Qarabağ məsələsinin
müzakirə predmeti olması Vaşinqtonun bölgəmizdə aktivləşmək istəyindən
qaynaqlanır”.
Bu sözləri iyunun 14-də NATO sammiti çərçivəsində
ABŞ Prezidenti Co Baydenlə Türkiyə Prezidenti Rəcəb Tayyib Ərdoğan arasında
görüşdə Qarabağ məsələsinin də müzakirə predmeti olacağına münasibət bildirərkən,
politoloq Natiq Miri deyib:
"Azərbaycan regionun ən güclü ölkəsidir. Ölkəmiz
yeni yaradılan kommunikasiya sistemində körpü rolunu oynayır. Bəllidir ki, Azərbaycan
olmadan regionda möhkəmlənmək mümkünsüzdür. Bu xüsusda da Türkiyənin Azərbaycanda
varlığı xüsusi əhəmiyyət kəsb edir. Həmin məqam da Ağ Evi Qarabağ məsələsini
Türkiyə ilə müzakirəyə çıxarmağa sövq edib”.
Həmsöhbətimiz düşünür ki, Bayden Ərdoğanla
görüş əsasında Türkiyənin Azərbaycanda varlığı və getdikcə möhkəmlənməsi məsələsini
müzakirə edəcək:
"Burada həmçinin Rusiyanın Qarabağda hərbi varlığı məsələsindən
danışacaqlar. Rusiyanın Azərbaycanda təkbaşına mövcudluğu ABŞ-ı qətiyyən qane
etmir. Azərbaycan Ermənistan sərhəd məsələsi, o cümlədən kommunikasiyaların
açılması da Ərdoğan Bayden görüşündə danışılacaq. Bu kimi məsələlərdə birgə hərəkət
etmək barədə razılığa gəlinərsə, belə vəziyyət
Türkiyə və Azərbaycanın maraqlarını ifadə edəcək. Çünki Türkiyə Azərbaycanda həlledici ölkə
statusundadır”.
Rüfət SULTAN