"Moskva bu təlxəyin fikirlərilə hərəkət etməyəcək”.

Sfera.az.a açıqlamasında bu sözləri rus siyasətçisi Vladimir Jirinovskinin hərbi əməliyyatlar dayandırılmasa, Rusiya qoşunlarının Qarabağa yeridilməli olduğu fikrinə münasibət bildirərkən Milli Məclisin deputatı Asim Mollazadə deyib:

"Hər zaman olduğu kimi Jirinovski öz sayıqlamalarını, dələduzluğunu davam etdirir. Düşünürəm ki, onun nə sayıqlamasından asılı olmayaraq, Rusiya dövləti bu təlxəyin fikirlərilə hərəkət etməyəcək”.

"Əslində Jirinovski Rusiya hökumətinin fikirlərini səsləndirib”.

Bunu isə sayta açıqlamasında deputat Vahid Əhmədov deyib: "Bu Jirinovskinin öz sözü deyil. O, bu ifadələri işlətməklə əslində Rusiya hökumətinin fikirlərini səsləndirib. Azərbaycan Prezidenti bu günlərdə açıqlamasında dedi ki, F-16 qırıcı təyyarələrimiz torpaqdadır, amma uçmur. Bu o deməkdir ki, kənar dövlətlər prosesə müdaxilə etsə, digər dövlətlər də prosesə qatılmalı olacaq. İnanmıram ki, Rusiya hökuməti Jirinovskinin bu fikirlərinə aludə olub, prosesə müdaxiləyə keçsin. Jirinovskidir də, o həmişə özüməməxsus şəkildə belə ifadələr işlədir”.

"Jirinovski yaşlaşdıqca yaddaşını itirir, sərsəmləyir”.

Bu fikirlər isə deputat Elman Məmmədova məxsusdur: "O, yaddan çıxarıb ki, 1991-ci ildə Sovet İttifaqı dağılıb. İndi ölkəmiz Moskvanın nəzarətində deyil. Biz də Rusiya kimi müstəqil dövlətik. Daxili işlərimizə qarışmağa heç kimin haqqı yoxdur. Azərbaycan indi torpaqlarını işğaldan azad edir. Beynəlxalq qanunlar ona bu hüququ verir. Vaxtilə Rusiya Şimali Qafqazda antiterror əməliyyatı keçirirdi. Azərbaycan bu zaman onun işinə qarışmırdı.

Rusiya ilə ölkəmiz arasında yüksək səviyyəli münasibətlər mövcuddur. Qarşılıqlı hörmət var. Jirinovski və onun kimi düşünənlər Azərbaycan-Rusiya münasibətlərinə xələl gətirmək istəyirlər. Ancaq heç nəyə nail olmayacaqlar. Rusiya Prezidenti Putin də deyib ki bu, Azərbaycanın daxili işidir. Jirinovski də Paşinyan kimi fikirləşir. Paşinyan da deyirdi ki, rus gəlib erməniləri qorumalıdır. Rusiya hökuməti heç bir halda Jirinovski kimilərin fikirlərinə uymamalı, sona qədər tərəfsizliyini qoruyub saxlamalıdır”.

"Jirinovski dəmşalaqdır”

Bu sözləri isə deputat Aqil Abbas dedi: Qarabağlılarda bir söz var, dəmşalaq - mənası səfeh, axmaq deməkdir. Jirinovski dəmşalaqdır. Rusiya hökuməti, şəxsən Prezident Putin münaqişə ilə bağlı öz sözünü deyib. Rusiya prosesə müdaxilə etməyəcək. Dəmşalaq isə çığırır, bağırır. Qoy bağırsın. Azərbaycan öz torpaqlarını azad edir. Rusiya daxili işimizə qarışa bilməz. Ermənistan qoşunları torpaqlarımızdan çıxandan sonra oturub danışarıq. Dünya birliyi ərazi bötövlüyümüzü tanıyır”.

Elçin

Sfera.az