İctimaiyyət arasında şəhid saylarının gizlədildiyi müzakirə edilir. Bu əlbəttə ki, düşmən təxribatıdır. Ermənilər sosial şəbəkədə azərbaycanlı kimi özlərini aparıb saxta profillərlə məlumatlar yayırlar. Köhnə videoları da bu məqsədlə çoxdan hazırladıqları kanallar vasitəsilə öz dilimizdə paylaşırlar.

 

Bu barədə deputat Musa Qasımlı Sonxeber.az-a açıqlama verib.

Deputat bildirib ki, təcavüzkar Ermənistanın ordusu heç bir zaman Azərbaycan ordusundan güclü olmayıb, güclü deyil və güclü ola bilməz:

Müharibə təkcə döyüş texnikası və canlı qüvvə ilə deyil, eyni zamanda informasiya vasitələri ilə də aparılır. İnformasiya müharibəsində bir çox sahələrdə üstünlük də əldə edilir. Həmçinin Ermənistanın Azərbaycana qarşı informasiya müharibəsi aparması, yalan və uydurmalar tirajlaması da səbəbsiz deyil. Bununla təcavüzkar ölkə insanlar arasında çaşqınlıq yaratmağa və öz istəyinə nail olmaq üçün çalışır. Amma unudurlar ki, Azərbaycan dövləti 90-cı illərdə deyil, əvvəlki illərdən qat-qat güclüdür. Biz təkcə döyüş məkanında deyil, həmçinin informasiya cəbhəsində də düşmənə layiqli cavab veririk. Düşmən heç bir zaman öz istəyinə nail ola bilməz. Baş verən hadisələr bizim cəmiyyətimizdə daha mütəşəkkil olmağı tələb edir.

Biz düşmənin fitnələrinə qətiyyən uymamalıyıq. Azərbaycan Ordusu güclüdür və qüdrətlidir. Cəmiyyətimizdə sabitliyin olmasına və psixoloji ruh yüksəkliyinin yaradılmasına hər bir kəs kömək etməlidir. Bu gün hər bir Azərbaycan vətəndaşı Ali Baş Komandan cənab İlham Əliyevin liderliyi ilə dövlətimizin ətrafında birləşməlidir. Bizim ümumi düşmənimiz var, o da təcavüzkar, işğalçı Ermənistandır".