Ümumilikdə 115 512 hektar sahədə biçin aparılıb, sahələrdən 337 600 ton məhsul yığılıb. Biçin aparılan sahələrdə məhsuldarlıq hər hektara orta hesabla 29,2 sentner təşkil edib. 

Sfera.az bildirir ki, taxıl biçini aparılan sahələrin əksəriyyəti arpa sahələrindən ibarətdir. Buğda sahələrinin çox az hissəsində biçin işləri görülüb. Buna görə də taxılda orta məhsuldarlığın qarşıdakı aylarda bir qədər artması ehtimalı yüksəkdir. Amma ümid edildiyi kimi daha böyük məhsuldarlığa nail olmaq bu il də mümkün olmayacaq. Ən yaxşı halda məhsuldarlığın taxılda 32-33 sentner, buğdada 33 sentner olması proqnozlaşdırılır. 

Xatırladaq ki, Azərbaycan 2015-ci ildən sonra taxıl istehsalında məhsuldarlığı artıra bilmir. Həmin ildən başlayaraq məhsuldarlıq 30-32 sentner arasında dəyişir. Daha əvvəlki illərdə isə məhsuldarlıq aşağı olub. Məhsuldarlıq 1995-ci ildə 15 sentner, 2000-ci ildə 24 sentner, 2005-ci ildə 26,5 sentner, 2012-ci ildə 27,2 sentner idi. 

Taxıl məhsulları arasında ən yüksək məhsuldarlıq payızlıq buğdada qeydə alınır. Buğdada məhsuldarlıq 30-32 sentner, arpada 27-29 sentner təşkil edir. 

Azərbaycanda taxıl əkilən sahələrin (1,07 milyon hektar) 60-65 faizi buğda əkini sahələrindən ibarət olur.