Xəbər verdiyimiz kimi, oktyabrın 1-də İran İsrailə kütləvi raket hücumu həyata keçirib. Ağ Evin məlumatına görə, İsraildəki hədəflərə 200-ə yaxın ballistik raket atılıb. İsrailin Baş naziri Benyamin Netanyahu İranın ölkəsinə qarşı kütləvi raket hücumunu böyük səhv adlandırıb və Tehranın buna cavab verəcəyini bəyan edib.

Hər iki ölkə ilə bir çox sahədə əlaqələrimiz var.

İran-İsrail münaqişəsi uzanarsa, bunun Azərbaycan üçün hansı təsirləri ola bilər?

Mövzu ilə bağlı Sfera.az-a açıqlamasında politoloq Natiq Miri bildirib ki, İran-İsrail müharibəsi anlayışı bu gün real deyil.

N.Miri qeyd edib ki, nə İsrail, nə də İran müharibə istəyir:

“İsrailin İranı yer üzündən silmək üçün potensialı yoxdur, çünki bunu etmək üçün böyük quru qoşunlarına ehtiyac var. İran böyük dövlətdir və əhalisi də dəfələrlə İsraildən çoxdur. İran da belə müharibə istəmir. İran bilir ki, İsrail tək deyil, onun ABŞ, İngiltərə kimi havadar dövlətləri var. Uzunmüddətli müharibədə İranın qələbə qazanmaq imkanı olmadığı kimi, İsrailin də iqtisadiyyatının darmadağın olması, hətta hakim rejimin çökməsi təhlükəsi var.Bu, ABŞ və koalisiyasının da marağında deyil, onlar əsgərlərini İrana göndərib öldürtmək istəmir. Sadəcə İran bəzən belə süni qarşıdurma yaratmaqla yeni şəkillənən dünyada öz rolunu artırmaq istəyir. Eyni zamanda, Yaxın Şərqdə İslam dünyasına ağalıq etmək fikrinə düşüb. İranın həm Yaxın Şərq, həm də Cənubi Qafqazda təsirini artırmaq üçün iştahı var. Lakin edə biləcəyini düşünmürəm”.

Siyasi şərhçi qeyd etdi ki, müharibə olarsa, bu, humanitar faciəyə çevrilə bilər:

“Müharibə olmadığı təqdirdə region, xüsusən də Azərbaycan üçün elə böyük təhlükələr olmayacaq. Əgər olarsa, əlbəttə, onun ciddi nəticələri olacaq. İran əhalisi 80 milyondan çoxdur. Bunun yarısını azərbaycanlılar və digər türklər təşkil edir. Bu insanların öz yurdlarını tərk etdiyi təqdirdə, təbii ki, Azərbaycan və Türkiyəyə yönələcəkləri bəllidir. Bu da Azərbaycan üçün böyük humanitar faciə yaradacaq hadisədir”. 

Firuzə Əliyeva