Məsələ ətrafında Sfera.az-a danışan qida təhlükəsizliyi üzrə ekspert Vahid Həsənov bəzi hallarda marketdə satılan adi suyun belə sağlamlığa ziyan vura biləcəyini deyib:

"Küçə ticarəti bizdə çoxdan qadağan olunub. Lakin nədənsə yenidən bu ticarət növü spirtli içki, xırda ticarət timsalında yayılmaqdadır. Düzdür, yay mövsümündə xüsusilə dənizə yaxın ərazilərdə bu ticarətə icazə verilir, lakin yenə də belə yerlərdən məhsul almaq bir qədər risklidir. Spirtli içkinin özünün xüsusi saxlama rejimi, realizasiyası var. Bu məsələ artıq küçə satışında pozulur. Bəzən görürük ki, ticarət şəbəkəsinin qarşısında sular, meyvə şirələri, spirtli içkilər günün altında qalır. Bu yolverilməzdir. Çünki mayenin daxili temperaturu dəyişir, qablaşdırma ilə reaksiyada mənfi hallar yaranır ki, bu da insana zəhərlənmə verə bilər. Bu baxımdan ilk növbədə məhsulun düzgün saxlanması qaydalarına əməl edildiyini bilməliyik”.

Ekspert alıcıların təmiz məhsulu ayırd edə bilmə imkanının olduğunu qeyd edib:

"Hər bir məhsulun uyğunluq, gigiyenik sertifikatı olur. Bundan başqa kiçik içki məntəqələrindən satışa icazə ilə bağlı sənəd tələb edilməlidir ki, məhsulun zərərsiz olduğuna əmin olaq. Çox təəssüf ki, insanlar bu sənədləri tələb etməyi ayıb hesab edirlər. Lakin unutmayaq ki, saxta məhsul hesabına həyatımızı riskə atmış ola bilərik. Hazırda mövsümlə əlaqədar olaraq insanlar ayaqüstü belə məntəqələrdən içki alıb içir. Yəqin ki, yaxın zaman ərzində sanitar epidemoloji mərkəzlər tərəfindən bu cür saxta içkilər təqdim edən məntəqələrin fəaliyyətinə xitam verilər. Əks halda belə məntəqələrin ciddi fəsadları ola bilər ”.