Saxta peyvənd arayışı satanları hansı cəza gözləyir? - Açıqlama
Sağlıq
13:43 / 20.05.2021
2628
Ötən gün Gəncə Hava Limanında Gəncə-
Sankt-Peterburq aviareysi ilə səyahət etmək istəyən 96 sərnişinin COVID-19-la əlaqəli
təqdim etdiyi tibbi arayışlar saxta çıxıb.
Milli Məclisin deputatı Azər Badamov
Sfera.az-a açıqlamasında saxta tibbi
arayışla bağlı halların çoxaldığını bildirib: "Gəncədə də bu istiqamətdə müəyyən olunmuş
halla bağlı hüquq-mühafizə orqanları tərəfindən araşdırma aparılır, həmin saxta
sənədlərin kimlər tərəfindən verilməsi, tərtib olunması kimi məqamlar müəyyənləşdiriləcək
və lazımi cəzalarını alacaqlar. Hər bir cəmiyyətdə belə saxta hərəkətlər
mövcuddur. Ən əsası odur ki, bu cür hallar aşkar edilir və araşdırılır”.
Müsahibimiz həmçinin vaksin vurdurmayan, bunun
əvəzinə saxta yollara əl atan vətəndaşlardan da söz açıb: "Vətəndaşların vaksindən boyun qaçırmaqları
fikrimcə, məsuliyyətsizliyin göstəricisidir. Çünki insan şüurlu şəkildə dərk
etməlidir ki, koronavirus təhlükəsindən, virusun yarada biləcəyi ağır fəsadlardan
qorunmağın yeganə yolu peyvəndlərin vurulmasıdır. Dövlət də vətəndaşların
sağlamlıqlarını düşünürək böyük vəsaitlər sərf edib ölkəmizə vaksin gətirir və
insanları pulsuz şəkildə vaksinləşdirməklə bəşəriyyəti narahat edən bu təhlükədən
qorumağa çalışır.
Təəssü ki, bəzən sosial şəbəkələrdə
də vaksinlərlə bağlı anti-təbliğat kampaniya xarakterli məlumatlar paylaşılır.
Hər bir insan düşünülmüş şəkildə vaksin vurdurmalı, həm özünü qorumalı, həm də
cəmiyyətin sağlamlığına öz töhfəsini verməlidir. Vaksin vurulması ilə bağlı
saxta yollarla arayışların alınması isə yolverilməzdir. Belə hallar müəyyən
olunduğu təqdirdə müvafiq orqanlar tərəfindən ciddi tədbirlər görülür”.
Günay Rəsulqızı