Bayram günlərində necə qidalanmalıyıq? - Mütəxəssislərdən TÖVSİYƏ

Yeni il bayramı kimi xüsusi günlərdə insanlar çox vaxt həddindən artıq qida qəbul edirlər. Bu da həzm problemlərinə və ya bayramdan sonra çəki artımına səbəb ola bilər. 

Sfera.az bildirir ki, mütəxəssislərin tövsiyələrinə görə, bayram günlərində qidalanmaya diqqət yetirmək vacibdir. 

Bunlardan biri balanslı qidalanmadır. Mütəxəssislər bildirirlər ki, hər növ qida qrupundan balanslı şəkildə yemək lazımdır. Yəni tərəvəzlər, zülallar, tam taxıllar və sağlam yağlar birgə qəbul edilməlidir. Bayram süfrəsindəki müxtəlif qidalar arasında tarazlıq saxlamaq insanlara bu baxımdan kömək edir. 

Eyni zamanda süfrədə çox yemək olsa da, kiçik porsiyalar seçmək və hər şeyi az-az dadmaq mədəni yüklənmənin qarşısını alır. Bu, həmçinin həddindən artıq kalori qəbulunun qarşısını alır. Diyetoloqlar bildirirlər ki, bayram vaxtı çox şirniyyat və ya yağlı qidalar yeyildiyinə görə, bədənin maye balansını qorumaq vacibdir. Buna görə də bol su içmək lazımdır.

Həmçinin əsas vacib məsələlərdən biri, şirniyyatlarla bağlıdır. Belə ki, bu cür qidalar bayramın ayrılmaz hissəsidir, amma onların həddindən artıq istifadəsi şəkər səviyyəsinin yüksəlməsinə və çəki artımına şərait yaradır. Şirniyyatları məhdudlaşdırmaq və meyvə kimi daha sağlam alternativlər seçmək tövsiyə olunur.

Ümumiyyətlə, yeməkləri yavaş-yavaş çeynəmək toxluq hissini artırır. Bu, həddindən artıq yeməyin qarşısını alır.  Yeməkdən sonra gəzintiyə çıxmaq və ya bir az hərəkət etmək də həzmə kömək edir. Bu hal bayram ərzində alınan əlavə kaloriləri yandırmağa kömək edir. Bu məsləhətlərə riayət etməklə bayram günlərini daha sağlam şəkildə keçirmək mümkündür.

Günay