C vitamini ilə ürək əzələlərinin bərpası sürətləndiriləcək - TİBDƏ YENİLİK

Seuldakı Koreya Universitetinin bir qrup koreyalı alimi digər hüceyrə növlərini transformasiya edərək ürək toxumasını bərpa etmək üçün texnologiya hazırlayıb. 

Sfera.az xəbər verir ki, tədqiqat “Experimental & Molecular Medicine”  (EMM) elmi jurnalında dərc olunub.

Belə ki, mütəxəssislər fibroblastları (birləşdirici toxuma hüceyrələri) yetkin və funksional induksiya edilmiş kardiyomiyositlərə (ürəyin əzələ hüceyrələri) çevirməyi öyrəniblər.

Metod yetkinləşməni sürətləndirən və hüceyrə funksiyasını yaxşılaşdıran C vitamini ilə fibroblast böyümə faktoru 4-ün birləşməsinə əsaslanır.

Təcrübələrdə elm adamları aydın şəkildə müəyyən edilmiş sarkomerlər (əzələ toxuması parçaları) və T-borucuqları (hüceyrə membranının elementləri) ilə daha yaxşı hüceyrə quruluşuna, təkmilləşdirilmiş ion kanalı funksiyası ilə artan elektrik aktivliyinə və yetkin, tam yenidən proqramlaşdırılmış hüceyrə yaratmaqda daha yüksək effektivliyə nail olublar. 

Tədqiqatçılar deyirlər ki, xəstənin öz toxumasından yetkin kardiomiositlərin yetişdirilməsi bir gün infarkt və ya digər ürək-damar xəstəlikləri nəticəsində yaranan zədələri bərpa etməyə kömək edə bilər.

Firuzə Əliyeva