Son zamanlar kolbasadan zəhərlənmə halları çoxalıb.

Bununla bağlı Sfera.az-a açıqlama verən qida məsələləri üzrə ekspert Ağa Salamov deyib ki, buna səbəb kimyəvi qidalar ola bilər və onlardan biri də elmi adı "mono sodium glutamate" olsa da, xalq arasında “Çin duzu” kimi tanınan dadlandırıcıdır:

“Bu tərkibin doza həddi aşılarsa, zəhərlənmə halları baş verə bilər. “Çin duzu” Azərbaycanda da satılır. Yəni, bunu alıb istifadə edənlər, doza həddini aşanlar da mövcuddur. Deməli, zəhərlənmələr qaçılmazdır. Bu qatqı şüuraltında “beşinci dad” hissini formalaşdırır və qidalara qarşı asılılıq yaradır. Bundan daha çox kolbasalarda, konservləşdirilmiş ət məhsullarında istifadə olunur. Bu isə obezitə , qaraciyər piylənməsi və ürək qan-damar sistemi pozğunluqları yaradır”.

Mütəxəssis bildirib ki, zəhərlənmə halları həm də müxtəlif səbəblərdən ola bilər:

“Məsələn, mənşəyi məlum olmayan ət, emal prosesində qidanın çirklənməsi, daşınmada buraxılan kobud səhv, işçilərdən və ya səthlərdən antisanitariya vəziyyətində yaranan çarpaz çirklənmə, məhsulların düzgün şərtlər altında saxlanmaması və.s zəhərlənmə hallarına yol aça bilər”.

Qeyd edək ki, “Çin duzu” adi halda ağ rəngli toz şəklindədir.

Günay