Günvurma təhlükəsindən necə qorunmalıyıq? – Məsləhətlər

Son günlər ölkə ərazisində müşahidə edilən isti hava şəraiti ilə əlaqdar fövqəladə Hallar Nazirliyi əhaliyə müraciət edib.

Nazirlik tərəfindən günvurma təhlükəsindən qorunmaq üçün yüksək temperaturlu günlərdə açıq havada çox qalmamaq, habelə açıq rəngli, yüngül, xüsusilə pambıq parçadan olan geyimlərdən istifadə etmək, daha çox kölgədə və ya sərin yerdə qalmaq və bol maye qəbul etmək tövsiyə olunub.

Maraqlıdır, dözülməz istilərdən necə qoruna bilərik?

Həddindən artıq yüksək temperatur heç bir sağlamlıq problemi olmayan bir çox insana belə mənfi təsir göstərir. Havanın temperaturu 32˚C-dən yuxarı, rütubət 60%-dən yuxarı olduqda istilik sindromları yaranmağa başlayır. “Mən gəncəm, mənə heç nə olmayacaq” demək yanlışdır. Bu məsələyə uşaqdan, yaşlıdan, gəncdən asılı olmayaraq hər kəsin diqqətli yanaşması çox vacibdir.

Bulanıq görmənizin səbəbi günvurma ola bilər

Çox yüksək hərarətli günlərdə rast gəlinən günvurma mühüm və təhlükəli sağlamlıq problemidir. Yüksək hərarət, tərləyə bilməmək, sinir sistemində pozğunluqlar, halsızlıq, başağrısı, başgicəllənmə, qusma, ürəkbulanma, nəbzin tezliyi günvurmanın ilk əlamətləri ola bilər. Daha sonra qavrayış və koordinasiya qabiliyyətinin pozulması, görmə aydınlığının pisləşməsi, şüurun itirilməsi baş verə bilər. Belə hallarda vaxt itirmədən sağlamlıq mərkəzinə müraciət etmək lazımdır.

İstilik xroniki yorğunluğa səbəb olur

İsti havalarda yataqdan qalxmaqda çətinlik, gündəlik işləri görmək istəməmək kimi hallar ola bilər. Bu dövrdə qeyri-kafi qida qəbulu, vitamin və mineral çatışmazlığı istidən xroniki yorğunluq şikayətlərini artırır. Ancaq istidən qaynaqlandığı düşünülən bu cür yorğunluq uzun müddət davam edərsə və tez-tez baş verirsə, bunun altında yatan digər sağlamlıq problemləri də nəzərə alınmalıdır. Yorğunluq əlamətlərini artıran səbəblər qalxanabənzərvəz və böyrəküstü vəzilərin fəaliyyətindəki pozğunluqlar, təzyiq xəstəlikləri, ürək xəstəlikləri, yoluxucu xəstəliklər, həddindən artıq siqaret və qan azlığıdır.

Xroniki yorğunluğa qarşı isti duş qəbul edin

İstidən yaranan xroniki yorğunluğun qarşısını almaq üçün balanslaşdırılmış qidalanma və nizamlı yuxu vacibdir. Xüsusilə isti duş, canlandırıcı təsir göstərə bilər.

İsti havada yaxşı yatmağın sirri pambıq yataq dəstləridir

İsti havada sağlam və keyfiyyətli yuxuya sahib olmaq üçün qidalanma qaydalarına diqqət yetirməli, yaxşı yuxu mühiti yaratmaq lazımdır. İlk növbədə axşam yeməyində ağır, yağlı yeməklərdən və kofeindən uzaq durmalısınız. Bunlar yuxuya getməyi çətinləşdirir və ya onun keyfiyyətini pisləşdirir. Yataq yerinin havalı olmasına, yataq dəstinin pambıq məhsullardan seçilməsinə diqqət yetirilməlidir.

Kondisionerlə soyumağa çalışarkən pnevmoniyaya tutulmayın

Kondisioner pnevmoniyanın ən mühüm səbəblərindən biridir. Buna kondisionerlərdən götürülən “Legionella” bakteriyası səbəb olur. Onlara yaxşı qulluq edilsə və aşağı parametrlərdə istifadə edilərsə, kondisionerlər sağlamlığımıza zərər verməyəcək. Ancaq kondisionerlər şüursuz istifadə edildiyi üçün hətta sağlam insanı da xəstələndirə bilər. Yuxu zamanı kondisionerləri aşağı temperaturda qoymaq düzgün deyil. İdeal olaraq, temperatur 23-24 dərəcə, nisbi rütubət isə 40-50 faiz arasında olmalıdır.

İnci