"Azərbaycanda peyvəndləmə ilə bağlı sığorta məhsulu yoxdur. Buna görə də peyvəndləmə zamanı hər hansı yan təsir, sağlamlığa ciddi zərər olarsa, həmin şəxs İcbari Tibbi Sığorta Agentliyinə qarşı məhkəmə iddiası qaldıra bilər”.

Bunu peyvənd olunacaq şəxslərin sığortalanması imkanları ilə bağlı Sfera.az-ın sualını cavablandıran sığorta sahəsi üzrə ekspert, hüquqşünas İlkin İbrahimov bildirdi. İ.İbrahimov söylədi ki, peyvəndləmə ilə bağlı sığorta məhsullarına digər ölkələrdə də az rast gəlinir. "Məsələn, Türkiyədə peyvəndləmə ilə bağlı sığorta təminatı yoxdur”, - deyən ekspert hesab edir ki, peyvəndləmə zamanı dəyən zərərə görə təminatı İcbari Tibbi Sığorta Agentliyi verə bilər.

Onun fikrincə, Agentliyin kifayət qədər vəsaiti var və bu məsələdə məsul tərəf kimi öhdəlik daşımalıdır: "İcbari Tibbi Sığorta Agentliyi peyvənd olunanları sığortalaya bilər. Agentliyin maliyyə imkanları çox böyükdür. Agentlik dövlət büdcəsindən böyük məbləğdə vəsait cəlb edəcək. 2021-ci ildə Agentliyə 1 milyard manatdan artıq vəsait köçürüləcək.

Dövlət büdcəsindən vəsait ayrılması ilə bərabər qanunvericiliyə əsasən Agentlik başqa mənbələrdən də vəsait cəlb edəcək. 2021-ci ildə işəgötürən icbari tibbi sığorta ilə əlaqədar əməkhaqqı fonduna 1 faiz əlavə edəcək. Eyni qaydada maaş alan işçinin əmək haqqından 1 faiz pul tutulacaq. 2022-ci ildən icbari tibbi sığorta üçün tutulma dərəcəsi 2 faizə yüksələcək.

Bundan başqa benzin və dizel yanacağının, alkoqollu içkilərin, tütün məmulatlarının idxalı zamanı da icbari tibbi sığorta məqsədilə pul tutulur”.

Vasif

Sfera.az