Sfera.az xəbər verir ki, "Qafqazinfo”nun məhkəmə materiallarından əldə etdiyi özəl məlumata görə, Ə.Əhmədov vəzifə səlahiyyətlərindən sui-istifadə edərək, öz yaxın qohumlarının işə gəlməməsinə göz yumub, nəticədə, onlara dövlət büdcəsi hesabına əsassız olaraq əmək haqqı ödənilib.

Bir sıra polis əməkdaşlarını özünə məxsus ferma, balıqçılıq təsərrüfatı və şəxsi evində xadimə kimi işlədib.

Həmin polis əməkdaşlarına öz cibindən pul vermək əvəzinə, polis kimi işə çıxmadıqları halda dövlət büdcəsindən onlara əməkhaqqı verib. Bununla da dövlətin qanunla qorunan mənafelərinə ağır nəticələrə səbəb olan zərər vurub.

Nazir Əhməd Əhmədov qardaşını 2000-2002-ci ildə Naxçıvan Şəhər Polis İdarəsində, 2003-2011-ci ildə Naxçıvan MR Daxili İşlər Nazirliyinin Mühafizə Şöbəsində, 2011-ci ilin noyabr ayından isə Şahbuz Rayon Polis Şöbəsində polis sahə inspektoru vəzifəsinə təyin etsə də, o, işə çıxmayıb.

Onun qardaşı 2015-2017-ci ilin iyul ayınadək olan dövrdə 17 dəfə müxtəlif müddətlərdə ayrı-ayrı xarici ölkələrdə olub, işə çıxmadığı halda ona dövlət büdcəsindən 85 425 manat əməkhaqqı ödənilib.

Digər qardaşını isə 2012-ci ildən Polis Şöbələrindən birinə, 2013-cü ildən isə Ordubad RPŞ Biləv Polis Bölməsində vəzifəyə təyin edib. Həmin qardaşı da işə çıxmasa da, 2012-2017-ci illərdə ona 44 744 manat əməkhaqqı ödənilib.

Ə.Əhmədov qardaşı Fazil Əhmədovun qaynının oğlunu Şərur Rayon İbadulla Polis Bölməsinin cinayət-axtarış üzrə əməliyyatçısı kimi işə götürərək, onu özünün balıqçılıq təsərrüfatında işlədib. Maaşını isə dövlət büdcəsindən polis əməkdaşı kimi ödəyib Belə ki, 2015-2017-ci illərdə ona 16 670 manat əməkhaqqı ödənilib.

Əhməd Əhmədov evində qulluqçu işləyən şəxsi isə Babək Rayon Polis Şöbəsinin əməkdaşı kimi sənədləşdirərək, ona dövlət büdcəsindən 2015-2017-ci illərdə 4 624 manat əməkhaqqı ödənilməsinə şərait yaradıb.

Kəngərli RPŞ-nin dörd polis əməkdaşı nazirə məxsus olan Kəngərli rayonundakı yonca sahələrində otbiçən kimi işləyiblər. Onların hər birinə iki il ərzində dövlət büdcəsindən 14-16 min manat maaş verilib.

Rəsmi sənədlərdə polisin Müvəqqəti Saxlama yerində işləyən şəxs xidmətə çıxmayaraq, Əhməd Əhmədovun şəxsi fermasında işlərə cəlb olunub və büdcədən 17 442 manat əməkhaqqı alıb.

Nazirin qohumları olan və Babək RPŞ-də təhqiqatçı, operator, Ordubad RPŞ-də təhqiqatçı, Şahbuz RPŞ-də əməliyyat müvəkkili kimi vəzifə daşıyan şəxslər ümumilikdə 310 min manatdan çox maaş alsalar da, heç vaxt işə çıxmayıblar.