\"Rusiya XİN hansı hüquqla Qarabağ məsələsini xaricilərlə müzakirəyə çıxarır?\" - ETİRAZ
13:41 / 18.06.2021
2917
"Rusiya Xarici İşlər Nazirliyi artıq Qarabağ
problemi terminindən istifadə etməməli, beynəlxalq təşkilatlarla bu məsələnin
müzakirəsinə son qoymalıdır”.
Bu sözləri Sfera.az-a açıqlamasında Rusiyanın
xarici işlər naziri Sergey Lavrovun iyunun 21-də ATƏT-in Baş katibi Helqa Şmidlə
görüşdə digər məsələlərlə yanaşı Qarabağ məsələsini də müzakirəyə çıxaracaqlarına
münasibət bildirərkən, politoloq Məhəmməd Əsədullazadə deyib.
Həmsöhbətimiz qeyd edib ki, Lavrovun Şmidlə
görüşdə Qarabağ məsələsini müzakirə etməsi Azərbaycan tərəfdən qəbul edilən deyil: "Bu məsələ Azərbaycanın daxili işidir. Rusiya
və digərlərinin Qarabağla bağlı öz aralarında hər hansı müzakirə aparmaq və qərar
qəbul etməyə hüquqları yoxdur”.
M. Əsədullazadənin fikrincə, Bakının razılığı
olmadan Rusiyanın digər ölkə və ya qurumlarla Qarabağla bağlı bu sayaq təşəbbüsləri
Azərbaycanın daxili işinə müdaxilədir və belə cəhdlər fiaskoya uğrayacaq:"Ümumiyyətlə, Rusiya Xarici İşlər nazirilə ATƏT-in baş katibi bu məsələni hansı
əsasla öz aralarında müzakirə edirlər? Münaqişə artıq başa çatıb. Status məsələsi də gündəmdən çıxıb. Belə olan halda Rusiya və ATƏT-in bu davranışları
Azərbaycanın daxili işinə qarışmaq kimi qiymətləndirilməlidir”.
Rüfət SULTAN