"Son günlər Rusiyanın Ukrayna sərhədində
aktivləşməsi Kremlin Kiyevlə müharibə hazırlığında olduğundan xəbər verir.
Hesab edirəm, belə bir hücum baş versə, Rusiyanın qarşısında ilk növbədə NATO
bloku olacaq”.
Bu sözləri Sfera.az-a politoloq Turab Rzayev
Rusiyanın Ukraynaya müharibə elan edəcəyi təqdirdə Kremlin qarşısında kimin olacağı
ehtimalı haqda danışarkən deyib.
Onun sözlərinə görə, NATO blokuna daxil olan
dövlətlərin heç də hamısı Ukraynanı Rusiyanın qəzəbindən qorumaq niyyətində
deyil:
"Məsələ ondadır ki, uzun müddətdir NATO
daxilində də anqlosakson və Mərkəzi Avropa kontinentalı arasında parçalanma
mövcudur. Bunu Kreml də yaxşı bilir. Hətta demək olar ki, NATO daxilindəki
problemlərə görə Ukraynaya tam dəstək ola bilmir. Misal üçün, Rusiya ilə
Ukrayna arasında ehtimal edilən müharibə zamanı biz burada Almaniya və Fransanı
effektiv görməyəcəyik. Əvəzində isə ABŞ, Böyük Britaniya və Kanadanı daha aktiv
görə bilərik.
Rusiyanın Ukraynaya hücumu həm də Şərqi Avropa
və Baltikyanı ölkələrin də ona qarşı cəbhə almasına səbəb olacaq. Onsuz da bu
ölkələr uzun müddətdir ki, Rusiyaya qarşı soyuq münasibət sərgiləyir. Bu da təbiidir.
Məntiqlə Ukraynanın ardınca sıranın onlara gələcəyini düşünən bu ölkələr Ukraynaya
tam dəstək verəcək”.
Politoloqun sözlərinə görə, NATO ilk başda
Ukraynaya birbaşa dəstək verməyəcək:
"Hesab edirəm NATO Ukraynaya dolayı yolla dəstək
verəcək. Xüsusilə ABŞ rəsmi Kiyevə ölümcül silahlar verəcək. Bundan başqa böyük
miqdarda iqtisadi yardım edərək Kiyevin Moskva qarşısında məğlubiyyətə
uğramamasına çalışacaq. Əgər müharibənin miqyası genişlənsə Kiyev və digər
böyük şəhərlər təhdid altına düşsə, müharibədə Qərbin birbaşa iştirakı istisna
olunmur. Bəzi mənbələrə görə Britaniya artıq 9 min hərbiçisini Ukraynaya göndərib.
ABŞ da Ukraynaya yaxın ölkələrdə hərbi qüvvəsini artırır. ABŞ-ın hazırda Qara dənizdə
6 sualtı gəmisi var və bu gəmilərin hamısı nüvə başlığı daşıyır. Bu və digər məsələləri
nəzərə alsaq deyə bilərik ki, Kremlin Kiyevə hücumu ona baha başa gələcək”.
Turan Rzayev