Bununla bağlı politoloq Məhəmməd Əsədullazadə Sfera.az-a açıqlamasında qeyd edib ki, sözügedən ölkələrin parlament sədrlərinin bir araya gəlib, "Bakı Bəyannaməsi" imzalaması, "Şuşa Bəyannaməsi"ndən sonra, regionda yeni bir siyasi-hərbi platformanın qurulmasıdır.

Onun sözlərinə görə, Türkiyə məhz regional strateji mövqeyini gücləndirmək üçün xüsusilə, Mərkəzi Asiya, Orta Şərqdə  Azərbaycan və Pakistanla  birgə əməkdaşlığa əsaslanır:

"Bakı Bəyannaməsi" siyasi əməkdaşlığı nəzərdə tutsa da, artıq hər iki ölkə Azərbaycanla sıx hərbi əməkdaşlığa malikdir və hər iki ölkənin hərbçiləri Azərbaycanla birgə kordinasiyalı çalışır, birgə hərbi təlimlər keçirir. Ümumiyyətlə, "Bakı Bəyannaməsi"nin digər əhəmiyyətli hissəsi Pakistanla ikitərəfli və üçtərəfli hərbi əməkdaşlığın inkişafıdır. Cənubi Qafqazda Azərbaycanın Türkiyə və Pakistanın hərbi dəstəyini alması gələcək perspektivdə birgə ordunun yaradılmasını mümkün edə bilər. Bura Mərkəzi Asiyanın Türk dövlətlərinin də üzv olması reallaşa bilər. Türkiyənin strateji planı budur və regionda proseslər Azərbaycanın leyhinə dəyişir”.

Politoloq qeyd edib ki, Ermənistanın Azərbaycanla üçtərəfli sazişə əməl etməməsi, Fransanın və Rusiyanın Ermənistanın vasitəsilə təxribatlara əl atması, məhz Türkiyənin regionda artan aktivliyindən qaynaqlanır:

"Şuşa və "Bakı Bəyannaməsi" Azərbaycanın  hər iki ölkənin müttəfiqi olduğunun göstəricisidir. Pakistanın Azərbaycanla əlaqələrini inkişaf etdirməsi bu ölkənin Mərkəzi Asiya vasitəsilə Avropaya çıxışını da təmin etməklə yanaşı, regionda təsir gücünün artmasına gətirib çıxaracaq. Hər iki ölkə güclü orduya və  nüvə silahına malikdir. Azərbaycanın bu iki ölkə ilə müttəfiqliyi ölkəmizin təhlükəsizliyi üçün xüsusi əhəmiyyət kəsb edir”.