"Musiqi müəllimlərinin attestasiyanın keçirilməsi zəruridir" - Minaxanım Babayeva

2025-ci ilin fevralın 28-dən martın 19-na qədər Bakı və Abşeron-Xızı Regional İdarələr üzrə fortepiano və musiqi nəzəriyyəsi müəllimlərinin attestasiyası keçirilib. Attestasiyada 1700 müəllim iştirak edib. Komissiya üzvlərindən olan dosent, sənətşünaslıq üzrə fəlsəfə doktoru  Minaxanım Babayeva fortepiano müəllimləri üzrə komissiyanın sədri olub.

M.Babayeva attestasiya prosesi ilə bağlı Sfera.az saytına müsahibə verib. 

- Musiqi və incəsənət məktəbləri müəllimlərinin attestasiyası prosesini necə qiymətləndirirsiniz? Proses necə keçdi?

- Attestasiya prosesi yüksək səviyyədə təşkil olunmuşdur. Proses şəffaf formada həyata keçirildi. Attestasiyada iştirak edən müəllimlər cavablarına uyğun olaraq qiymətləndirilirdilər. Attestasiya prosesinin keçirilməsini yüksək qiymətləndirirəm və düşünürəm kifayət qədər vacib faktor idi.

- Attestasiyada daha çox müşahidə etdiyiniz məqamlar nələrdən ibarət idi? Ümumiyyətlə, bu attestasiyaya zərurət var idi? 

- Attestasiyanın keçirilməsi zəruridir. Bəzi musiqi məktəblərində vəziyyət heç də ürək açan deyildi. Ən çox mənfi nüanslardan biri də kifayət qədər iş təcrübəsinə malik müəllimlərin ümumi biliklərə malik olmamaları idi. Bu bizi kədərləndirirdi.

- Attestasiyanın nəticələrinə əsasən uyğun olmayan müəllimlərə nə tövsiyə edərdiniz?

- Müəllimlər hər zaman öz üzərində işləməli, özlərini inkişaf etdirməlidirlər. Müəllim yeni bilikləri öyrənməklə yanaşı dünya görüşünü də inkişaf etdirməlidir. O, yeni metodikalar öyrənməli, şagirdlərə yeni bilik ötürmək bacarıqlarına yiyələnməlidir. 
Mən müəllimlərin ixtisasları üzrə təkminləşdirmə kurslarında iştirak etdikdən sonra yenidən biliklərin yoxlanmasını tövsiyyə edirəm. 

Altay