Nazir istefaya hazırlaşır, İsrail-HƏMAS razılaşması kimin xeyrinədir? - ŞƏRH

Xəbər verdiyimiz kimi, İsrail, HƏMAS, ABŞ və Qətər təmsilçiləri atəşkəs barədə rəsmi razılaşma imzalayıblar. Sənəddə girovların azad edilməsi və Qəzza bölgəsində atəşin dayandırılması nəzərdə tutulur.

Bununla bağlı Sfera.az-a açıqlama verən siyasi şərhçi Şahin Cəfərli deyib ki, sözügedən anlaşmaya baxanda kimin qalib, kimin məğlub olduğu başa düşülmür. Onun sözlərinə görə, hətta razılaşmanın HƏMAS-ın lehinə olduğunu söyləmək yanlış olmaz:

“Birinci mərhələdə, yəni 42 gün ərzində cəmi 33 girovun əvəzində İsrail 1200-dən çox fələstinlini öz həbsxanalarından buraxacaq. Bunların içərisində terrorçuluqda və digər ağır cinayətlərdə ittiham olunan, məhkum edilən xeyli adam var. İsrail ordusu Qəzza daxilində hazırkı mövqelərindən 700 metr geri çəkiləcək, Misirlə sərhəddəki Rəfah nəzarət-buraxılış məntəqəsi açılacaq, humanitar yüklər əvvəlkindən artıq həcmdə Qəzzaya daxil olacaq. İkinci mərhələdə isə digər girovların buraxılması müqabilində İsrail ordusunun tamamilə Qəzzadan çıxması nəzərdə tutulur. Bu, o deməkdir ki, HƏMAS öz mövcudiyyətini qorumaq və yenidən güclənmək imkanı qazanır”.

Ekspert bildirdi ki, anlaşma İsrail hakim koalisiyası daxilində ultraradikal və dindar sionistlərin, yəni milli təhlükəsizlik naziri Ben Qvir və maliyyə naziri Smotriçin kəskin etirazına səbəb olub:

“Ben Qvirin istefaya hazırlaşdığı barədə xəbərlər var, Smotriç də partiyasının hökuməti tərk edə biləcəyini deyib.Bayden administrasiyası tərəfindən hazırlanan razılaşmanın qəbulunda Donald Trampın ciddi rolu oldu. O, andiçmədən əvvəl anlaşma əldə olunması üçün Netanyahuya təzyiq göstərdi və HƏMAS-a ultimatum verdi. Ənənəvi diplomatiyaya qıcığı olan Trampın sövdələşmə əldə etmə metodu budur. Demokratlar kimi uzun-uzadı, nəticəsiz görüşlər və telefon danışıqları aparmaq bu eqosentrik adamın stili deyil”.

Günay