““Neftçi”dən qisasımı aldım”

“Neftçi”yə qarşı oyunu müdafiədən qurduq, rəqibi təhlil etmişdik”.

Sfera.az-ın PFL-in saytına istinadən verdiyi məlumata görə, bunu Premyer Liqanın XVII turunda "Neftçi" - AZAL oyunundan (0:1) sonra "təyyarəçi"lərin baş məşqçisi Tərlan Əhmədov deyib.

AZAL-ın baş məşqçisi komandasında itkilərin çox olduğunu bildirib:

“Aleksandr Qurulinin zədəsi var, çox güman ki, son oyunda da iştirak edə bilməyəcək. Qvanzav və Nuqzar da zədədən əziyyət çəkir. Buna baxmayaraq, meydançaya çıxan futbolçular yüksək səviyyədə futbol sərgilədilər. “Neftçi”yə qarşı oyunu müdafiədən qurduq, rəqibi təhlil etmişdik. “Neftçi”nin bütün həmlələrinin qarşısını almaqla yanaşı, lazım olan qolu da vura bildik. İki gün sonra “Zirə”ni qəbul edəcəyik, həmin oyuna hazırlaşacağıq. Şüvəlana gələn bütün məşqçilərlə görüşmüşəm, amma bu gün oyundan öncə və oyundan sonra Əsgər Abdullayevlə görüş olmadı. Aramızda heç bir inciklik yoxdur. Ola bilər ki, vaxtilə ünvanımıza deyilən bəzi sözlərin müqabilində bu məğlubiyyət həzm olunmur”.

T.Əhmədov əlavə edib ki, onlar üçün hər oyun vacibdir, amma oyun oyuna bənzəmir:

“Komandanı yaradanda vaxt istəmişdim və bildirmişdim ki, bunun bəhrəsini görəcəksiniz. Düzdür, müəyyən tənqidlər oldu, amma biz oyundan oyuna inkişaf edirik. Açığı, “Neftçi” ilə oyun mənim üçün prinsipial idi. Bu görüş futbolçuların yox, mənim prinsipim idi. Cari mövsümdə “Neftçi”ni 2 dəfə məğlub etmişik; bu bizim yox, komandanın əməyidir. “Neftçi”ni 2-1 hesabı ilə udanda rəqib düşərgədən demişdilər ki, AZAL küçə komandasıdır. Əlbəttə ki, bu sözdən sonra “Neftçi” mənim üçün prinsipial rəqib olacaq. Əgər mən bu gün AZAL-da işləyirəmsə, bu komandanın şərəfini qoruyuram. Heç kim heç kimi aşağılaya bilməz. Həmin o sözə görə biz bu gün “Neftçi”ni üstələdik və mən qisasımı aldım”.

“Neftçi”nin baş məşqçisi Əsgər Abdullayev isə həmişə futbolçulara komandaları reytinqlərə bölmək lazım olmadığını dediyini xatırladıb:

“Əsas işimiz oyuna köklənmək olmalıdır. Amma görünür ki, biz hələ bunun üzərində işləməliyik. AZAL komandasını qələbə münasibətilə təbrik edirəm. Bu komandanın öz oyun üslübu var. Kimin bu rəqibin ünvanına “küçə komandası” dediyini bilmirəm. Küçə komandasının Premyer Liqada nə işi var? Mənim Tərlan Əhmədovdan incikliyim yoxdur, ona əl uzatdım. Öz futbolçularıma qarşı əsəbi idim. Özümü çox pis hiss edirdim, dərman qəbul etməli idim. Vəziyyəti başqa dona salmaq lazım deyil”.