Baydenin Fələstinlə bağlı dəyişən ritorikası: İsrailə XƏBƏRDARLIQ ETDİ
"ABŞ İsrailin fələstinlilərin təhlükəsizliyini nəzərə almayan heç bir əməliyyatını dəstəkləməyəcək".
Sfera.az "Politico"ya istinadən xəbər verir ki, bunu ABŞ Prezidenti Co Bayden bildirib.
O, İsrailə Qəzzanın cənubundakı Rəfah şəhərinə hücum barədə xəbərdarlıq edib.
“Rəfahda böyük hərbi əməliyyat, orada sığınan bir milyondan çox insana təhlükəsizlik və dəstək təmin etmək üçün etibarlı plan olmadan həyata keçirilməməlidir. Onların müdafiəyə ehtiyacı var”, - Bayden qeyd edib.
Amerika lideri İsrailin Qəzza zolağındakı hərbi əməliyyatlarını da birbaşa tənqid edib. O, münaqişədən sağ çıxa bilməyən 27 mindən çox fələstinlinin çoxunun günahsız mülki vətəndaşlar və uşaqlar olduğunu deyib:
“Bir çox ailələr bir yox, çoxlu qohumlarını itirib, yas saxlaya bilmirlər. Bu, ürək ağrıdır”.
Bayden daha əvvəl Fələstin dövlətinin qurulması üçün Fələstin Milli Administrasiyasında (PNA) islahat aparmağa çağırış etmişdi. O vurğulayıb ki, Fələstin Milli Administrasiyası təkcə İordan çayının qərb sahilində deyil, həm də Qəzzada fələstinlilərin ehtiyaclarını effektiv şəkildə qarşılamalıdır.
Əzizə Zeynal
