"İş yükü çox, aldıqları maaş az..." - Xidmət sektorunun inkişafını ləngidən amillər

Ölkədə xidmət sektorunda çalışan insanların bir çoxu aqressivdirlər. Azərbaycanda istər ticarət, istərsə də digər xidmət obyektlərində müştəri məmnuniyyətinə xüsusi önəm verilmir. Bu da özlüyündə müştəri sayının azalmasına və xidmət sektorunun inkişafının ləngiməsinə səbəb olur.

Bəs xidmət sektorunda çalışanların davranış qaydaları necə tənzimlənməlidir?

Mövzu ilə ilə bağlı Sfera.az-a danışan Azad İstehlakçılar Birliyinin sədri Eyyub Hüseynov bildirib ki, dünya təcrübəsinə nəzər yetirsək görərik ki, müştərilərlə davranış qaydaları barədə dövlət və qeyri hökumət təşkilatları tərəfindən xüsusi seminarlar keçirilir.

“Ölkəmizdə isə xidmət sektoru üçün heç bir təlim və seminar təşkil olunmur. Ümumillikdə Azərbaycanda restoran biznesində vəziyyət ürəkaçan deyil. Xidmət sektorunda çalışanların vətəndaşlarla kobud rəftarı aldıqları məvacibin az olmasından asılıdır. Onların iş yükü çoxdur, lakin aldıqları maaş onları qane etmir. Elə bu baxımdan müştərilərin suallarına və istəklərinə aqressiya göstərirlər”.

Eyyub Hüsynov bildirib ki, həmin şəxslər xüsusi treninqlərdə və kurslarda iştirak etməli, xidmət sektorunun davranış qaydalarını öyrənməlidirlər. “Həmin şəxslər əziyyətlərinin qarşılığını ödəyəcək məbləğdə məvacib alsalar işlərini sevərək icra edəcəklər”.

Ülkər Abdurahmanlı