Ötən il Azərbaycan iqtisadiyyatı 1,1 faiz böyüyüb – RƏQƏMLƏR

Azərbaycanda 2023-cü ildə 123 milyard manatlıq və ya 72,35 milyard dollar dəyərində ümumi daxili məhsul (ÜDM) istehsal edilib. 

Sfera.az Dövlət Statistika Komitəsinə istinadən xəbər verir ki, ÜDM istehsalı əvvəlki illə müqayisədə real rəqəmlərlə 1,1 faiz artıb, nominal qiymətlərlə müqayisədə isə 8,07 faiz azalıb. 

2022-ci ildə Azərbaycanda ÜDM istehsalının nominal dəyəri 133,8 milyard manat (78,7 milyard dollar) olmuşdu. Müqayisədə ötən il ÜDM istehsalında nominal qiymətlərlə 10,8 milyard manat azalma var. 

2023-cü ildə ÜDM-in nominal dəyərinin kiçilməsinə səbəb iqtisadiyyatın neft-qaz sektorunda istehsalın azalması və qiymətlərin enməsi ilə bağlıdır. Bu iki səbəbdən ötən il neft-qaz sektorunda ÜDM istehsalı həm nominal, həm də real qiymətlərlə azalıb. Bu sektorda real azalma 1,7 faiz təşkil edib. 

Amma qeyri neft-qaz sektorunda real olaraq istehsal 3,7 faiz artıb.

ÜDM-in nominal dəyərinin azalması adambaşına düşən istehsal göstəricisinə də təsir edib. 2022-ci ildə 13 292 manat olan adambaşına istehsal dəyəri ötən il 12 114 manata geriləyib.

Vasif