İlon Maskın bu ilki zərəri açıqlandı: Ötən ilki qazancından çox..

“Tesla”, “SpaceX” və “Twitter”in rəhbəri İlon Mask bu il təxminən 122,6 milyard dollar itirib.

Sfera.az bildirir ki, bu barədə “Bloomberg” məlumat yayıb.

Qeyd olunub ki, sözügedən vəsait itkisi iş adamının 2021-ci ildə qazandığı məbləğdən çoxdur. Nəşrin məlumatına əsasən, Maskın xalis sərvəti təxminən 147,7 milyard dollar təşkil edir və bu da son iki ildən artıqdır ki, ən aşağı dəyərdir.

İş adamının kapitalı əsasən, “Tesla”nın səhmləri və opsionlarından ibarətdir.

Qeyd edək ki, Mask ötən gün səhmlərinin qiyməti oktyabr ayından bəri ən aşağı səviyyəyə endiyi üçün 7,7 milyard dollar itirib. “Bloomberg”ə görə o,  milyarderlər sıralamasında ikinci sıradadır. Reytinqə LVMH şirkətlər qrupunun (Louis Vuitton Moet Hennessy) prezidenti Bernard Arnault başçılıq edir. Onun sərvəti təxminən 161 milyard dollardır.

Günay Rəsulqızı