BMT-də erməni təxribatı – Laçın dəhlizi ilə bağlı müzakirələr kimlərin oyunudur?

Ermənistan tərəfinin müraciəti əsasında BMT Təhlükəsizlik Şurası Laçın dəhlizi ətrafındakı vəziyyəti  müzakirə edib.

Müzakirədə Rusiya, ABŞ, Böyük Britaniya və Rusiya kimi ölkələrin ermənipərəst mövqe sərgiləməsi isə birmənalı qarşılanmayıb. Belə ki, adıçəkilən ölkələr özündə Azərbaycan tərəfini güzəştə getməyə səsləyən eyhamları ehtiva edən açıqlamalar veriblər.

Maraqlıdır, Azərbaycan tərəfinin məsələyə reaksiyası necə olacaq?

Mövzu ilə bağlı Sfera.az-a danışan millət vəkili Asim Mollazadə BMT Təhlükəsizlik Şurasının iclasında səsləndirilən fikirlərin yekun rəy yaratmadığını deyib. Deputatın sözlərinə görə, bəzi ölkələr müəyyən təsirlər altında belə mövqe sərgiləyib:

“Fransanın və bəzi ölkələrin mövqeyi BMT-nin Təhlükəsizlik Şurasının mövqeyi deyil. Səsləndirilən fikirlər Fransanın və erməni diasporasının təsiri altında olan ölkələrin mövqeyidir. İlk olaraq Vardaryanın oyunlarının qarşısı alınmalı, erməni təxribatlarına son qoyulmalıdır. Yeri gəlmişkən, bir sıra maliyyə cinayətləri törətmiş şəxsə qarşı sanksiyaların olmaması da çox ciddi şübhələr yaradır. Fransa və digər ölkələr əslində Vardaryana qarşı addımlar atmalı idilər. Düşünürəm ki, ayrı-ayrı ölkələrin yanlış mövqeləri heç nəyi dəyişdirmir. Azərbaycan öz torpağında hüquqlarını, ətraf-mühiti qorumaq istəyir. Bununla yanaşı, Azərbaycan öz ərazisində yaşayan milli azlıqların da hüquqlarını qorumağa hazırdır. Lakin buna maneə törədən rus və erməni silahlı birləşmələri var”.

Millət vəkili bəzi ölkələrin sülh prosesinə əngəl olduğunu da sözlərinə əlavə edib:

“Rus sülhməramlıları indi öz üzərilərinə düşən vəzifəni layiqincə yerinə yetirmirlər. Biz hazırda problemlərin danışıqlarla həlli yoluna hazırıq. Lakin ilk olaraq təxribatlara son qoyulmalı, erməni diasporunun təsiri altında olan tərəflərin açıqlamaları dayanmalıdır. Bu cür mövqelərin sərgilənməsi Azərbaycan və Ermənistan arasında sülh prosesinə maneə yaradır”.

Əzizə Zeynal