General Etibar Mirzəyev Türkiyədə rəsmi görüşlər keçirdi - FOTO
13:27 / 14.05.2022
1639
Fövqəladə hallar nazirinin müavini general-leytenant Etibar Mirzəyev İstanbulda Türkiyənin daxili işlər nazirinin müavini İsmayıl Çataklı, Daxili İşlər Nazirliyinin Fövqəladə Halların İdarə olunması Agentliyinin (AFAD) rəhbəri Yunus Sezər və AFAD-ın Baş əməliyyat idarəsinin rəisi Yusuf Aysu ilə görüşüb.
Sfera.az xəbər verir ki, ikitərəfli əməkdaşlığın dostluq və qardaşlıq əsasında davam etdiyini qeyd edən nazir müavini Etibar Mirzəyev, Azərbaycan-Türkiyə əlaqələrindən danışaraq BMT çərçivəsində fəaliyyət göstərən Beynəlxalq Axtarış-xilasetmə üzrə Məşvərətçi Qrupu tərkibində iki qardaş ölkənin müvafiq qurumlarının səmərəli əməkdaşlığının əhəmiyyətini vurğulayıb. Nazir müavini bildirib ki, ikitərəfli görüşlər, təlimlər və məsləhətləşmələr fəaliyyət imkanlarının artırılmasına, eyni zamanda 2022-ci ilin sonunda Azərbaycanda keçiriləcək beynəlxalq INSARAG klassifikasiyasının hazırlıq prosesinə əvəzsiz töhfə verəcək. O, Azərbaycan FHN-in Beynəlxalq Axtarış-xilasetmə Dəstəsinin INSARAG klassifikasiyasından uğurla keçməsi üçün verdiyi dəstəyə görə Türkiyə tərəfinə təşəkkür edib.
İsmayıl Çataklı Türkiyədə baş vermiş təbii fəlakətlər zamanı Azərbaycan tərəfindən edilən yardımlara görə Prezident İlham Əliyevə və qardaş ölkə Azərbaycana təşəkkürünü bildirib. Nazir müavini ölkələrimizin müvafiq qurumları arasında axtarış və xilasetmə sahəsində əməkdaşlığın uğurla davam etdirilməsində səylərinə görə Azərbaycanın fövqəladə hallar naziri general-polkovnik Kəmaləddin Heydərova təşəkkür edib.