Bununla bağlı Sfera.az-a açıqlama verən siyasi şərhçi Kənan Novruzov deyib ki, son vaxtlaradək ölkədə daxili vəziyyət stabil olsa da, Paşinyanın Moskvaya səfərindən və Rusiya prezidenti Vladimir Putinlə görüşündən sonra durum dəyişib:

"Həm daxildə etiraz aksiyaları başlandı, həm də sərhəddə təxribatlar intensivləşdi. Ermənistanın müxtəlif rəsmiləri, o cümlədən Paşinyan, XİN rəhbəri Ararat Mirzoyan və başqaları Moskva səfərinədək Aəzrbaycanla sülh danışıqlarında maraqlı olduqlarını söyləyirdilər. Putinlə Paşinyan arasındakı görüşdən sonra isə səslənən bəyanatların məzmunu dəyişdi. Bütün bunlar onu göstərir ki, Moskvanın İrəvana təzyiqləri artır. Bu isə Azərbaycanla Ermənistan arasında yekun sülh müqaviləsinin gündəmə gəlməsi, birbaşa təmasların yaranması, həmçinin Qərbin bu məsələdəki təşəbbüskarlığı ilə bağlıdır. ABŞ dövlət katibi Entoni Blinkenlə Ermənistan xarici işlər naziri Ararat Mirzoyan arasında görüş və əldə olunan razılıqlar da, şübhəsiz, Kremli narahat etməmiş deyil”.

Müsahibimiz bildirib ki, Moskva görüşü Putinin ürəyincə olmayıb:

"Hətta, ola bilsin, Kreml Ermənistanı Qərbdən "qoparmaq” üçün Ukrayna ilə müharibədə konkret mövqe sərgiləyəcəyinə dair Paşinyandan təzminat istəyib, lakin buna nail olmayıb. Ona görə də indi Kremli cəzalandırmaq, belə demək mümkünsə, Paşinyanın "ağlını başına gətirmək” qərarına gəlib.  Aksiyalar, yəqin ki, o qədər çox çəkməyəcək. İndiki məqamda Paşinyanın devrilməsi və hakimiyyətə "Qarabağ klanı”nın üzvlərinin gəlməsi Putin  üçün prioritet deyil. Ən azından ona görə ki, indi onu düşündürən daha vacib məsələlər var. Çox güman, mitinq Paşinyan təhlükəni hiss edənədək davam edəcək. Kremlə lazım olan da budur. Yaxın günlərdə Putinlə Paşinyan arasında telefon danışığının olması, hətta yaxın iki həftə ərzində baş nazirinin yenidən Moskvaya səfər etməsi istisna deyil. Beləliklə, Putin ötən görüşdə nail olmadığı məqsədlərini indi reallaşdırmağa çalışa bilər. Bu məqsədlər arasında Azərbaycanla Ermənistanın yaxınlaşmasına mane olmaq, Qərblə İrəvanın "arasını vurmaq” və s. var”.