Son günlər cinayət əməllərinə səbəb olan polislərlə bağlı məsələ müzakirə obyektinə çevrilib. Bu hadisəlr cəmiyyətimizdə polislərin şiddətə meyilli olduğu istiqamətində fikirlərin yaranmasına səbəb olub.

Maraqlıdır, polislər işə qəbul edilərkən psixoloji testlərdən keçirilirmi və ya keçirilməlidirmi? Polislərin davranışlarına necə nəzarət olunmalıdır?

Bununla bağlı Sfera.az-a açıqlama verən "Polisə dəstək" İctimai Birliyinin sədri Şəmsəddin Əliyev bildirib ki, uzun illərdir polisə  xidmətə qəbul zamanı şəxslər tam tibbi müayinədən keçirlər:

"Onların psixoloji, sağlamlıq durumu yoxlanılır, təhlil edilir, ondan sonra xidmətə qəbul olunurlar. Cəmiyyətdə zaman-zaman təəccüb doğuran, ictimaiyyəti narahat edən, həyəcan təbili ilə müşahidə edilən cinayətlər olub. Bu meydançada polisi qınaq obyekti kimi işıqlandırmaq düzgün deyil. Bütün dövlət qurumları cəmiyyətdə baş verəcək cinayətlərin qarşısını almaq üçün müəyyən mənada maarifləndirmə tədbirləri həyata keçirməlidirlər. Bu, birlikdə olmalıdır, təkcə hüquq-mühafizə orqanlarının üzərinə qoymaq olmaz. DİN spesifik qurum kimi cinayətkarlıqla mübarizə aparır və bunun görünməyən tərəfi ondan ibarətdir ki, həyata keçirilən əməliyyat-axtarış tədbirləri ilə bağlı cəmiyyətin həmişə məlumatı olmur. Müəyyən müddətdən sonra bəzi informasiyalar gün üzünə çıxır. 

Ötən gün polisin nişanlısını öldürməsi, bundan əvvəl mərkəzdə həyat yoldaşını qətlə yetirən polis – bunların psixoloji durumunu deyə bilmərəm. Amma vətəndaşın özünün təfəkküründə müəyyən anda dərhal çat baş verə bilr. Belə insanlar öz hərəkətini qısa zaman ərzində qəlibə sala bilmir. Ümumiyyətlə, bu cür hadisələr Ailə, Qadın və Uşaq Problemləri üzrə Dövlət Komitəsi tərəfindən öyrənilməli və təhlil olunmalıdır”.

Müsahibimiz deyib ki, səbəblər araşdırıldıqdan sonra bu istiqamətdə müəyyən təkliflər verilməlidir:

"Komitənin yerlərdə qurumu var və onların işi məhz bundan ibarətdir. Qətl hadisəsinin baş verdiyi, intiharların olduğu ailələri mütləq tədqiq etmək lazımdır. Yalnız bundan sonra biz aydın şəkildə hadisənin törədilməsinə gətirib çıxara biləcək faktorları öyrənib, bütövlükdə ölkədə aradan qaldırılması istiqamətində kompleks tədbirləri görə bilərik.  Bu, silsilə şəkildə davam etməlidir. Amma təbii ki, polis xidmətində çalışanlar tərəfindən öz həyat yoldaşına, nişanlısına qarşı bu şəkildə davranış, hərəkət qəbuledilməzdir. Nəzərə alaq ki, 40 min şəxsi heyəti olan dövlət qurumunun sırasında 2 nəfər belə bir zorakılığa yol verib".