Avtomobillərin və ehtiyat hissələrinin idxalına xərclənən vəsait kəskin artıb - CƏDVƏL
16:10 / 28.01.2022
1050
Ötən il avtomobillərin və onların ehtiyat hissəslərinin idxalına Azərbaycanın xərclədiyi vəsait kəskin şəkildə artıb.
Sfera.az Dövlət Gömrük Komitəsinə istinadən xəbər verir ki, idxala xərclənən vəsait 354,7 milyon dollar, yəni 43,8 faiz artaraq 1,165 milyard dollara çatıb. Bununla da avtomobillərin və onların ehtiyat hissələrinin idxalında 2012-ci ildə qeydə alınan ən yüksək nəticədən (1 milyard dollar) daha yüksək göstərici qeydə alınıb.
Avtomobillər və onların ehtiyat hissələrinin idxalına çəkilən xərcin ümumi idxaldakı payı isə 10 faizə çatıb. Bu da son illərin ən yüksək göstəricisidir.
Qeyd edilən istiqamətdə daha bir rekord ehtiyat hissələrinin idxalında baş verib. İndiyə qədər ən yüksək göstərici 2019-cu ildə (132,6 milyon dollar) qeydə alınmışdı. 2021-ci ildə isə rekord səviyyədən 97,4 milyon dollar, yəni 73,5 faiz çox idxal həyata keçirilib və ehtiyat hissələrinin alışına çəkilən xərc 230 milyon dollara çatıb.
Amma avtomobil idxalında rekordu təzələmək mümkün olmayıb. Avtomobil idxalına ən çox vəsait 2012-ci ildəki 947 milyon dollardır. Ötən il avtomobil idxalına 935,2 milyon dollar xərclənməklə rekord səviyyəyə yaxınlaşılıb.
Onu da bildirək ki, 2016-cı ildən sonra avtomobillər və onların ehtiyat hissələrinin idxalına çəkilən xərcdə sürətli artım var. Bu, cari əməliyyatlar balansı üçün yaxşı əlamət deyil. Çünki idxalın sürətlə artması xarici valyutada olan iri məbləğdə vəsaitlərin ölkəmizdən çıxışına səbəb olur.
2014-2021-ci ildə avtomobillərin və onların ehtiyat hissələrinin idxalına çəkilən xərclər, onun ümumi idxaldakı payı ilə bağlı məlumatlar aşağıdakı cədvəldə əksini tapıb:
Vasif
Sfera.az
