\"Paşinyan bunu etsə, danışıqlar çətin olacaq\" - Politoloq
11:03 / 18.01.2022
500
"Türkiyə Ermənistanla danışıqlarda Azərbaycanın maraqlarını nəzərə alır”.
Bunu Sfera.az-a açıqlamasında politoloq Məhəmməd Əsədullazadə deyib. O bildirib ki, xüsusilə iki ölkə arasında sərhədlərin açılması Ermənistanın Azərbaycanın ərazi bütövlüyünü tanıması ilə nəticələnməlidir:
"Bu da sülh müqaviləsinin bağlanmasına gətirib çıxarmalıdır. Məhz rəsmi Bakının da gözləntiləri bundan ibarətdir. Ermənistan Baş naziri Nikol Paşinyan Türkiyə ilə danışıqlar fonunda Zəngəzurda dəmiryolunun tikintisi üçün işçi qrupu yaratdı. Əgər Ermənistan tərəfi danışıqlar prosesində ərazi bütövlüyünü tanımasa, yaxud Qarabağın dağlıq hissəsi istisna olmaqla tanıyarsa, danışıqlar çətin olacaq”.
Politoloq əlavə edib ki, Rusiya Qarabağın etnik ermənilər yaşayan ərazisini delimitasiya və demarkasiya prosesindən kənar hesab edir:
"Nikol Paşinyanın etnik ermənilərin yaşadığı ərazi olmaqla, Azərbaycanın ərazi bütövlüyünü tanıması mümkündür. O halda ki, oradakı ermənilərə özünü idarəetmə sistemi verilsin. Türkiyə prosesdə var. Ankara İrəvanla bu məsələni müzakirə edir”.
Xatırladaq ki, yanvarın 14-də Moskvada Türkiyə və Ermənistan arasında ilk rəsmi görüş keçirilib.
Günay Rəsulqızı
Sfera.az