Moskvada Əliyev-Paşinyan görüşü mümkündür? - AÇIQLAMA
13:07 / 22.12.2021
988
Ermənistan mediası Azərbaycan Prezidenti İlham Əliyev ilə Ermənistan Baş naziri Nikol Paşinyanın ilin sonuna kimi Rusiyanın paytaxtı Moskva şəhərində görüşə biləcəyini yazır. Görüşün mümkünlüyü həm də Soçi razılaşmasının praktiki mərhələyə keçirilməsi baxımından vacib hesab edilir.
Maraqlıdır, indiki halda belə bir görüşün keçirilməsi mümkündürmü?
Mövzu ilə bağlı Sfera.az-a açıqlama verən siyasi şərhçi Asif Nərimanlı deyib ki, bu mümkündür.
"Görüş Moskva şəhərində baş tutacaq. Görüşün geniştərkibli olması gözlənilir. Yəni müdafiə nazirləri, üçtərəfli İşçi Qrupunun üzvləri və xarici işlər nazirlərinin də iştirak edəcəyi iddia olunur. Belə bir tərkibdə görüşün olması ciddi gözləntilər yaradır:
Birincisi, sərhədlə bağlı razılaşmada praktiki addım atıla bilər. Çünki müdafiə nazirlərinin iştirakı delimitasiyaya dair müqavilənin imzalana biləcəyi ehtimalını önə çıxarır.
Soçidə sərhədin delimitasiyası, ardınca demarkasiya üzrə ikitərəfli komissiyanın yaradılması razılaşdırıldı. Bu o deməkdir ki, delimitasiya sərhədin xəritə üzərində çəkilməsi Rusiyanın da prosesdə iştirakı ilə həyata keçiriləcək. Demarkasiya üzrə yaradılacaq ikitərəfli komissiya delimitasiya müqaviləsi əsasında sərhədi çəkəcək.
İkincisi, kommunikasiya üzrə Soçi və Brüssel razılaşmaları əsasında görüləcək işlər konkretləşdirilə bilər. İşçi Qrupunun iştirakının bununla bağlı olacağı mümkündür.
Üçüncüsü, yekun sülh sazişinin müzakirəsi təşkil edilə bilər. XİN rəhbərlərinin iştirakı bu ehtimalı önə çıxarır. İstisna deyil ki, Rusiya gələcəkdə imzalanması gündəmdə olan yekun sazişin vasitəçiliyini indidən üzərinə götürmək istəyir.
Turan Rzayev
Sfera.az
