Qorbaçov ondan kömək istəyən Yuliyanı niyə rədd edib? – Sonuncu baş katibin ilk sevgilisinə məktubu
10:59 / 11.10.2021
1463
Sfera.az Sovet İttifaqı Kommunist Partiyası Mərkəzi Komitəsinin sonuncu Baş Katibi (1985-1991), SSRİ-nin ilk və son prezidenti Mixail Qorbaçovun ilk sevgi hekayəsini təqdim edir. Beləliklə...
Onlar
qonşu kəndlərdə yaşasalar da, eyni orta məktəbdə təhsil alıblar. Aralarında iki
yaş fərqi olduğundan ayrı-ayrı siniflərdə oxuyublar. Mixail Qorbaçovla Yuliya
Karaqodinanı bir-birlərinə yaxınlaşdıran isə məktəbdəki dram dərnəyi olub. Hər
ikisi dərnəyin ən fəal üzvləri sayılıblar. Mixail Qorbaçov ilk sevgisini də məhz
bu dərnəkdə tapıb.
Yuliya
Karaqodina gələcəkdə SSRİ-nin birinci xanımı statusunu qazanmağa tam şanslı
olub. Sonralar özünün etiraf etdiyinə görə, Mixail Qorbaçovla onun arasında əsl
məhəbbət yaşanıb. Münasibətlər o qədər ciddiləşib ki, Qorbaçov Yuliya Karaqodinanın
valideynləri ilə tanış olmağı, özünü onlara tanıtmağı, təqdim etməyi də
planlaşdırıb. Amma Karaqodina gələcəyin baş katibinə bu addımı atmağa icazə
verməyib. Səbəb isə yoxsul və zirzəmi şəraitində yaşamaları olub. Yaşam tərzinə
görə Qorbaçovlar ailəsi daha yaxşı yaşayıblar, onlar torpaq sahəsinə, normal şəraitli
evə sahib olublar. Ata qayğısından uşaq vaxtlarından məhrum olan Yuliya
Karaqodina isə tək anasının himayəsində çətinlik və ehtiyac içində böyüyüb.
Orta məktəbi
bitirdikdən sonra gənclərin yolları ayrılıb. Karaqodina Moskvada pedaqoji instituta qəbul olunub.
Lakin yataqxana ilə təmin olunmadığından o, təhsil almaqdan imtina etmək məcburiyyətində
qalıb, kəndə qayıdaraq oxuduğu məktəbdə işləyib. Bundan xəbər tutan Qorbaçov
Karaqodinaya qınaq dolu məktub yazıb, onu iradəsizlikdə günahlandırıb:
"...Mən sənin
güclü olduğunu bilirdim. Gərək geri çəkilməyəydin. Rektorun qapısında yataydın,
yataqxanada yer almaq üçün mübarizə aparaydın. Səni əmin edirəm ki, belə etsəydin
istədiyinə nail olacaqdın,
ali təhsil ala biləcəkdin.
Təəssüf edirəm...”
Növbəti il
Yuliya Karaqodina Krasnodarda instituta qəbul olunub. Qorbaçov ona təbrik
açıqcası göndərib: "Təbrik edirəm! Nə qədər ki, nəfəs alıram ümid edirəm...”
Karaqodina onun nəyə işarə etdiyini yaxşı anlayıb və açıqcada yazdığını cavabsız qoymayıb: "Nəfəs al, amma
ümid etmə...”
Yulia Karaqodina
gələcəyin baş katibini ümidsiz qoymasını isə sonralar belə açıqlayıb:
"Aramızda sevgi
var idi, bu şübhəsizdir. Dram dərnəyində oynadığım rollardan birində belə bir məqam
var idi, mən üzümü tərəf müqabilimə, Qorbaçova tutub söyləyirdim: "Məndən yüz dəfə
də sizi sevdiyimi soruşsanız, yüz dəfə də cavab verərəm ki, sevirəm”. Məşq
zamanı bu sözləri deyəndən sonra Qorbaçov gəlib qarşımda dayandı, "bu həqiqətdir?”
deyə soruşdu. Mənim təbəssümümüm onun sualına
cavab idi. Məktəbdən sonra yollarımız ayrıldı. Biz artıq əvvəlki yeniyetmələr
deyildik. Onun həyata fərqli baxışları var idi və açığını deyim ki, zaman
keçdikcə onun sevgisinə inamım da azalırdı.
Qorbaçov məktəbdə
oxuyanda aktyor olmaq arzusu ilə yaşayırdı. Düzdür, o, sonralar müsahibələrində
hələ məktəb illərindən hüquqşünas olmaq məqsədini qarşısına qoyduğunu söyləyib.
Bu etirafında Mixail qeyri-səmimi olub. Mən ilk dəfə onu televizorda görəndə
yanımdakılara dedim ki, Mişa
heç dəyişməyib, məktəbdə
olduğu kimi yenə də artistlik edir...”
Qorbaçov və Karaqodina
ayrı-ayrılıqda eyni ildə ailə həyatı qurublar. Qorbaçov Raisa Maksimovna ilə,
Karaqodina isə təyyarəçi olan sinif yoldaşı ilə nikaha girib. 1957-ci ildə hər
iki cütlüyün qız övladı dünyaya gəlib və hər iki cütlük övladlarına eyni adı -
İrina adını veriblər.
Nikaha girdikdən
sonra Yuliya həyat yoldaşının soyadını götürüb. Bəlkə də Qorbaçov nə vaxtsa onu
Karaqodina soyadı ilə axtarıb, sadəcə ilk sevgisi kimi. Yuliya bu ehtimalın
inandırıcı olmadığını da bildirib: "İnanmıram ki, Mixail öz keçmişinə boylanaydı.
Onun üçün hələ məktəb illərində karyera hər şeydən üstün idi...”
Yuliya
Karaqodinanın şəxsi həyatı uğursuz alınıb. O, bir neçə ildən sonra həyat
yoldaşı ilə ayrılıb. Amma təkbaşına qız övladını böyüdən Karaqodina bədbinliyə
qapılmayıb. O, vaxt məhdudiyyətinə, maddi sıxıntılara baxmayaraq dissertasiya
müdafiə edib, uğurlu müdafiədən sonra Karaqodina Moskva Pedaqoji İnstitutunda
anatomiya və fiziologiya kafedrasında işə qəbul edilib.
Uşaqlıq illərində
zirzəmidə yaşayan yaşayan Yuliya Karaqodinanın Moskvada da mənzil problemi
olub. Uzun illər
kirayələrdə yaşayıb. Bu problemin həlli üçün çox qapılar döysə də, heç bir nəticə
hasil olmayıb. Nəhayət, hər yerdən əlini
üzəndə o, ilk sevgisinə, Mixail Qorbaçova müraciət etməyi qərarlaşdırıb. Həmin
vaxt artıq Mixail Qorbaçov Mərkəzi Komitədə katib vəzifəsində işləyib.
Karaqodina Qorbaçova yazdığı məktubda mənzil məsələsində ona köməklik etməsini
xahiş edib. Qorbaçovun isə cavab məktubu yalnız bir cümlədən ibarət olub: "Mənzil
məsələsi mənim fəaliyyət sahəmə daxil deyil...”
Əslində,
həqiqətən də mənzil məsələsi Qorbaçovun fəaliyyət sahəsinə daxil olmayıb. Belə
ki, o, Mərkəzi Komitənin kənd təssərüfatı üzrə katibi olub. Amma Mərkəzi Komitənin
katibi, Kremlin yüksək ranqlı məmuru kimi Qorbaçov üçün ilk sevgisinə mənzil məsələsində
kömək etmək olduqca adi bir məsələ olub. Görünür siyasət, karyera, vəzifə hərisliyi
Qorbaçova ən kövrək və həssas hissləri də unutdurub.
Amma bəlkələlə
dolu bir məsələ də var. Bəlkə də Qorbaçov ilk sevgisindən geri çəkilməsəydi,
Raisa Maksimovna ilə ailə həyatı qurmasaydı, SSRİ-nin birinci ledisi onun siyasətinə
müdaxilə etməsəydi baş katibin başındakı papağını külək aparmayacaqdı və o,
ömrünün son günlərində əllərdə qalmayacaqdı. Və bəlkə də Yuliya Karaqodina
birinci ledi statusuna sahib olsaydı SSRİ-nin birinci və sonuncu prezidentinin
həyatında fərqli bir iz qoyacaqdı. Hər halda çox vaxt əlçatmaz olan ilk məhəbbət
daha səmimi, daha güvənli və daha təsirli olur...
Sfera.az