"Bu qüvvələr Dağlıq Qarabağın meşə və dağlıq hissəsində təxribat xarakterli əməllərini davam etdirməyə, müxtəlif terror aktları törətməyə çalışacaqlar”.

Bu sözləri Sfera.az-a açıqlamasında qondarma "DQR” adminstrasiyasının Ermənistana köçməsi fonunda onların savaş bitdikdən sonra regionun təhlükəsizliyinə hansı təhdidlər törədə biləcəyi ehtimalına toxunarkən politoloq Natiq Miri deyib:

"Ermənistanda mərkəzi hakimiyyətlə hesablaşayan real güc formalaşıb. Bu səbəbdən sabah Paşinyan hökuməti kapitulyasiya şərtlərini qəbul etsə belə, həmin qruplaşmalar və onların "mühacir hökuməti” Dağlıq Qarabağın meşə və dağlıq hissələrində təxribat xarakterli əməllərini davam etdirməyə çalışacaqlar. Onlar həmçinin regionda müxtəlif terror aktları törədə də bilərlər. Qondarma rejimin Ermənistanda yerləşməsi fonunda belə bir təhlükə mövcuddur”.

Natiq Miri bildirir ki, qondarma rejimin İrəvana qaçması əslində həmin qondarma qurumun sonu deməkdir:

"Görünür, onlar qondarma rejimin bundan sonrakı fəaliyyətinin perspektivini görmədikləri üçün ərazini tərk ediblər. Bu da o anlama gəlir ki, qondarma olsa da "DQR” idarəetmə strukturu, hakimiyyəti deyilən hər hansı bir struktur artıq yoxdur. Bu həm də o anlama gəlir ki, belə bir hakimiyyət yoxdursa, artıq Dağlıq Qarabağa hansısa legitim statusun tələb olunması da absurddur. Çünki artıq məkan, idarəetmə strukturları yoxdursa, tanıma məsələsi də ortadan qalxır. Bu məsələ bitdi”.

Elçin

Sfera.az