Dünya bazarında qızılın qiyməti son 7 həftənin minimal səviyyəsinə - 1 217,50 dollar/unsiyaya enib. 

Report xəbər verir ki, qızılın qiymətinin enməsinə əsas səbəb ABŞ-da açıqlanan yeni inşa olunan evlərin satış həcminin kəskin artması amili olub. ABŞ-da açıqlanan iqtisadi göstəricilərin müsbət tendensiyası investorlarda Federal Ehtiyat Sisteminin (FES) iyun və ya iyul iclasında uçot dərəcəsini artırması ehtimallarını gücləndirib. Bu da heç bir gəlir gətirməyən alternativ yatırım aləti olan qızıl aktivlərindən çıxışı sürətləndirib.

"Hər şey FES-in iyun ayında faiz artırmasına bağlıdır", - deyə "Mitsubishi Bank"ın analitiki Conatan Batler bildirib. Keçən həftə açıqlanan FES protokollarına görə, iyunda artım ehtimalları yüksəlib: "Bu, təbii ki, qızıl üçün yaxşı deyil. Çünki dollar yüksəlib, ABŞ-ın 2 illik və 10 illik istiqrazlarının gəlirliyi artıb. Buna baxmayaraq, hazırda qızıl ilin əvvəlindəki qiymətindən 15% yüksək satılır".

"Societe General"dan Robin Bar isə qeyd edib ki, investorlar qlobal iqtisadi qeyri-müəyyənliyə görə qızıl aktivində son 5 ilin ən maksimal uzun mövqeyindədirlər. Lakin son vaxtlar onların öz mövqelərini bağlamağa başladıqları müşahidə edilir - bazarda qızıldan əldə edilmiş gəlirlərin fiksasiyası baş verir. Qeyd edək ki, ABŞ-ın törəmə maliyyə aktivləri üzrə nəhəng şirkətlərindən biri olan "CME Group" FES-in uçot dərəcəsini iyulda artırması ilə bağlı gözləntilərini 60%-ə, iyun üçün isə 38%-ə yüksəldib.

"Report"un analitik qrupu qızılın unsiyasının 1 250 dollara qədər yüksəldikdən sonra 1 150 dollara qədər enəcəyini proqnozlaşdırır. Uzun müddətdə isə qızılın 900 dollar/unsiyaya qədər enməsi ehtimalı qüvvədə qalır.

-----------

09:38